yahi nahin ki faqat teri justuju bhi main

By

yahi nahin ki faqat teri justuju bhi main
khud apne aap ko pane ki aarzu bhi main
udas udas sar-e-saghar-o-subu bhi main
yam-e-nashat ki ek mauj-e-tund-khu bhi main
mujhi mein gum hain kai tirgi ba-kaf raaten
ziya-farosh sar-e-taq-e-arzu bhi main
mujhi se qaem-o-daem hain ghar ke sannate
tumhaari bazm-e-tamanna ki haw-hu bhi main
nihan mujhi mein hai qatil bhi aur masiha bhi
ki chaak-e-zakhm bhi main sozan-e-rafu bhi main
khud apne aap mein jhankun to main bhi main na rahun
nigah khud se hataun to chaar-su bhi main
jo rah chalte meri samt aankh bhi na uthae
usi ki bazm ka mauzu-e-guftugu bhi main
tumhaari bazm se uthne ka bhi khayal mujhe
zara si der thaharne ka hila-ju bhi main
tilism-e-duri-o-qurbat ko tod kar 'sadiq'
pukarta hai koi aaine se tu bhi main

azmat-e-fikr ke andaz ayan bhi honge

By

azmat-e-fikr ke andaz ayan bhi honge
hum zamane mein subuk hain to garan bhi honge
jin sitaron ko khuda man ke puja tha kabhi
ab unhin par mere qadmon ke nishan bhi honge
kaise rah sakti hain jannat ki fazaen shaffaf
khak udane ko hamin log wahan bhi honge
be-sutun azmat-e-farhad ka mazhar hai to kya
ahl-e-dil kitne hi benam-o-nishan bhi honge
dil kai aur bhi dhadkeenge mere dil ki tarah
apne qisse ba-hadis-e-digaran bhi honge
yun to tazin-e-gul-o-ghuncha mein shamil hain sabhi
hae wo rang jo ab harf-e-khizan bhi honge
jab shaguft-e-gul-e-baadam ki rut aaegi
koete ko nahin bhulenge jahan bhi honge
awwalin did mein hi apni nigahen kho kar
zindagi-bhar teri jaanib nigaran bhi honge
khud-numai ke liye bante ho mazlum 'nasim'
zakhm khae hain to kuchh un ke nishan bhi honge

apni aankhon se to dariya bhi sarab-asa mile

By

apni aankhon se to dariya bhi sarab-asa mile
jo bhi naqd-e-jaan lutane aae hum se aa mile
ab wafa ki rah par har samt sannata mile
ahl-e-dil ke karwan kin manzilon se ja mile
lap pe gar naghma nahin palkon pe hi tara mile
gul nahin khilte to koi zakhm hi khilta mile
rang-o-bu ke pairahan mein phul hain ya zakhm hain
ab na wo kaliyan na wo patte na wo saya mile
imtihan tha maslahat thi ya meri taqdir thi
main gulistanon ka talib tha mujhe sahra mile
umr-bhar har ek se main ne chhupae dil ke dagh
aaj ye hasrat ki koi dekhne wala mile
main ne jin aankhon mein dekhe the samundar maujzan
un mein jo bhi dubne wala mile pyasa mile
naz us ka pasban andaz us ka ham-zaban
khalwaton mein bhi wo mujh se anjuman-ara mile
aaj phir chhedunga main mahtab ki kirnon ke tar
kash imshab to mile ya koi tujh jaisa mile
aankh sau rangon ki talib hosh sau rangon ka zakhm
dil ko ye zid hai ki teri aarzu tanha mile
ajnabi rahen bhi 'sadiq' ajnabi rahen na thin
jab kisi ke jaane-pahchane nuqush-e-pa mile

bedil ka taKHayyul hun na ghaalib ki nawa hun

By

'bedil' ka takhayyul hun na ghaalib ki nawa hun
is qafila-e-rafta ka naqsh-e-kaf-e-pa hun
raqsan hai charaghan-e-tamanna mere harsu
wo raushaniyan hain ki main sae se juda hun
jab dasht-e-alam se koi jhonka kabhi aaya
main lala-e-khud-raw ki tarah aur khila hun
zulmat-aman bhi hun ujalon ka amin bhi
main subh ke tare ki tarah dub raha hun
aflak-rasi se bhi talafi nahin hoti
kis azm ki an-dekhi chatanon se gira hun
har aks-e-muqabil se numayan hai mera naqsh
duniya mein hun ya aaina-khane mein khada hun
mahdud hai kyun hadd-e-talab tak meri parwaz
main mauj-e-saba ho ke bhi zanjir-ba-pa hun
idrak ke shoalon ka chaman hai mera aahang
main barg-e-khizan ho ke bhi gulzar-numa hun
ehsas ke ghunchon ki chatak hai meri aawaz
main sina-e-afaq mein dhadkan ki sada hun
har chand ki nas nas mein nihan barq-e-tapan hai
khul kar bhi barasta hun ki ghanghor ghata hun
ek ek kiran mein tere sau rang nazar aae
jab pichhle pahar chand ke hamrah chala hun
ek naghma-e-rangin hun lab-e-saz-e-mizha par
'sadiq' jaras-e-ghuncha hun taswir-e-sada hun