shab-e-surur nai dastan visal-o-firaq

By

shab-e-surur nai dastan visal-o-firaq
na fikr-e-sud-o-ziyan darmiyan visal-o-firaq
main us se baat karun bhi to kis hawale se
ki mustaar makan mein kahan visal-o-firaq
usi ke nam pe jite hain aur marte hain
yahi hai qissa-e-ashutagan visal-o-firaq
wo kah gaya hai ki aaunga muntazir rahiyo
main mubtala-e-yaqin-o-guman visal-o-firaq
wo padh raha tha bade ghaur se lahu ki sarisht
har ek bund ka sirr-e-nihan visal-o-firaq
hawa-e-subh na jaane kahan kahan le jae
shab-e-murad shab-e-darmiyan visal-o-firaq
main us ko hath lagata bhi kis tarah 'sahba'
ajib kashmakash-e-jaan azan visal-o-firaq

KHwab dekhun koi mahtab lab-e-baam utre

By

khwab dekhun koi mahtab lab-e-baam utre
yun bhi ho jae murad-e-dil-e-nakaam utre
agle waqton ki bashaarat se ho duniya raushan
aasmanon se zamin par tera inam utre
yaad aae to khilen phul chale purwai
dard jage to tera aks tah-e-jam utre
main charaghon se hamesha teri biti puchhun
bin batae tu mere ghar mein sar-e-sham utre
main dua mangun kisi nek ghadi mein 'sahba'
us ka dukh mera muqaddar ho mere nam utre

jawaz-e-ab-o-tab ab gulab ke liye nahin

By

jawaz-e-ab-o-tab ab gulab ke liye nahin
hamari yaad zinat-e-kitab ke liye nahin
nikal ke aasman pe aa samundaron pe nam likh
tu chand hai to chadar-e-hijab ke liye nahin
meri amanaten sambhaal ujal de mere nuqush
ye dard ab kisi se intisab ke liye nahin
murawwaton ke zakhm bhi aziz rakhna jaan se
suluk-e-dostan hai ye hisab ke liye nahin
lahu ka zaiqa na chakh lahu ka tajraba na kar
lahu hai iztirab iztirab ke liye nahin
mere junun ko khair-o-shar ke daere se dur rakh
ye zindagi ka husn intikhab ke liye nahin
har ek ajnabi se apna muddaa bayan na kar
nazar-shanas hai to ijtinab ke liye nahin

ek ek se yahi kahta hun bata main kya hun

By

ek ek se yahi kahta hun bata main kya hun
ek muddat hui main bhul gaya main kya hun
naqsh-bar-ab sahi aap bana aap mita
ab talak hilti hai zanjir-e-sada main kya hun
apni pahnai mein gum-karda nishan hun main bhi
tu agar hai isi duniya ka khuda main kya hun
ek tarikh-e-wiladat hai meri ek wafat
in haqaeq ke siwa aur bata main kya hun
ab kahan dhundhne jaoge mujhe ai logo
ho chuka khak gai le ke hawa main kya hun

ek main hun ek tu hai ba-KHabar koi nahin

By

ek main hun ek tu hai ba-khabar koi nahin
hath mein de hath apna sar-ba-sar koi nahin
sham mushfiq hai qarib aa dard ka darman karen
raat ke sahra mein apna chaara-gar koi nahin
ret ke sine pe rah rah kar chamak uthta hai kuchh
ab ba-juz ek naqsh-e-pa ke rahbar koi nahin
mod ke baen taraf hai sang-andazon ka shahr
dil sa aaina na le ja shishagar koi nahin
jaane ye aaseb hai kis ki sada ka dar-ba-dar
main yahan hun main yahan hun dida-war koi nahin
dhundte phirte ho kis ko chand ki mashal liye
zindagi ek fasla hai muntazar koi nahin

ahbab bhi hain KHub ki tashhir kar gae

By

ahbab bhi hain khub ki tashhir kar gae
mera sukut ishq se tabir kar gae
jadu-asar the hont ki saghar ko chum kar
kuchh aur hi sharab ki tasir kar gae
har uzw jaise jism ka tha bolta hua
lahrae us ke hath ki taqrir kar gae
az-baam ta-ba-mai-kada gesu dhuan dhuan
aalam tamam halqa-e-zanjir kar gae
tahrir-e-khatt-e-jam se sab wa hue rumuz
hum uqda-e-miyan ki tadbir kar gae
han katiban-e-nama-e-amal ko thi kad
kuchh aur meri fard mein tahrir kar gae
'sahba' wo ek lafz tha diwar ka likha
hum jo mite to ishq ki tauqir kar gae