shaffaf rang

By

sham ki aahat jab aane lag jae
sabiqa libas utar dene ke amal ko
mizan-e-nazar par rakh lena chahiye
taki wo maila libas sham ka hi hissa na ban jae
hamein ujle libas ki fikr karni chahiye
safed ujla shaffaf rang
tahira libas ka hi hissa hai
aur hum is subh-yafta libas ke
pahanne ke ahl sabit ho gae to
najat hi najat hai
sifat hi sifat hai
lekin hum amal-e-tahira se guzre baghair
ujla libas pahan kar bhi
apni gard-e-kashafat chhupa nahin paenge
behtar hai amal-e-jariya ko hi afzal manen
naqsh-e-mubin hasil ho jae
makan ko makin, makin ko makan mil jae
aasman ko zamin zamin ko aasman mil jae

kisi aaine ka

By

main khud ka taaruf kya de sakta hun
aaina jab mujh ko mera hi chehra dikhlata hai
jaise mera chehra mera nahin aaine ka hai
lekin jis ka chehra apna hota hai
waqai us ka chehra hota hai
aaine aise chehre ko dikhlane se aajiz hota hai
wo us chehre ko munakis karta hai
kyun ki jo chehra, chehra hota hai
muhtaj nahin wo hota hai
kisi aaine ka
kisi wasile ka

KHud ko KHud mein tahlil karo

By

chup-chap raho
warna khamoshi ki chadar
chaak ho jaegi
mumkin hai is ki ye paki bhi
paki na rah jae
aur yahin phir din ke dhalne par
ehsas-e-gunah badh jae
paki, paki na rah jae
aur yahin ye khamoshi ki chadar
odh na pae
kodh man ka wo ban jae
behtar hai chup-chap raho
is khamoshi ki chadar ko
gard-e-ana se dur rakho
khud ko duniya se dur rakho
duniya khud ban jao
apne andar tah-dar-tah baatin mein
ek jahan aabaad karo
akhlaq o sadaqat
sabr-o-qanaat
abd o riyazat
samten ban jaen
arz o sama ban jaen
khud ko khud mein tahlil karo
apni phir takmil karo

ghar

By

diwar aisi mat utha
pani
mitti
hawa
muttasil hain
aag ne tapaya hai inhen
tumhaare fel-e-manfiya se
ittisal tut jaega
rang zanjiron se nahin bandhta
koi ghar diwar se nahin banta
banta hai
khule darwazon se
khuli khidkiyon se

be-ghari

By

jate kyun nahin ho
ye ghar mera nahin hai
jo tum andar aana chahte ho
main ghar mein rah kar bhi be-ghar hun
aur tum ko yaqin nahin aata
bar bar mana karne ke bawajud
nahin jaana chahte ho
aur mujhe is be-ghari mein
be-ghar kar dena chahte ho

asasa

By

kyun tum ne palkon par
itni sari yaaden yakja kar li hain
in yaadon ko tah mein putliyon ke
rakh do
taki yaaden ruswai ki gard se
maili na ho jaen
yaaden asasa hain guzre lamhon ki
in guzre lamhon ko
haal ke lamhon mein mudgham kar do
khud ko khud mein zam kar do
yaadon ko bojh samajh kar mat jhatko
in ko be-parda karne ki aadat tark karo
wo to sarmaya hain
anmol asasa hain