wo bhi hamein sargiran mile hain

By

wo bhi hamein sargiran mile hain
duniya ke ajib silsile hain
guzre the na chashm-e-baghban se
jo ab ki bahaar gul khile hain
rukta nahin sail-e-girya-e-gham
ai zabt ye sab tere sile hain
kal kaise juda hue the hum se
aur aaj kis tarah mile hain
pas aae to aur ho gae dur
ye kitne ajib fasle hain
sunta nahin koi 'saif' warna
kahne ko to sainkadon gile hain

umr guzri meri shirini-e-guftar ke sath

By

umr guzri meri shirini-e-guftar ke sath
lab milae the kabhi main ne lab-e-yar ke sath
gham-e-jaanan ki aziyyat gham-e-duniya ka azab
zindagi main ne guzari bade aazar ke sath
gard mein dub gaya silsila-e-sham-o-sahar
waqt bhi chal nahin sakta meri raftar ke sath
meri khuddar tabiat ne bachaya mujh ko
mera rishta kisi darbar na sarkar ke sath
dekhna kucha-e-jaanan mein kahin 'saif' na ho
ek saya sa nazar aata hai diwar ke sath

shaguft-e-ghuncha-e-mahtab kaun dekhega

By

shaguft-e-ghuncha-e-mahtab kaun dekhega
main so gaya to mere khwab kaun dekhega
kab aaengi wo ghataen jinhen barasna hai
mere chaman tujhe shadab kaun dekhega
ye baada-khwar nahin dekhte haram hai ki dahr
tumhaari bazm ke aadab kaun dekhega
jo shahr ho gae ghaarat wo kis ne dekhe hain
jo hone wale hain gharqab kaun dekhega
bana raha hun safina ki 'saif' mere baad
bachega kaun ye sailab kaun dekhega

qaza ka waqt ruKHsat ki ghaDi hai

By

qaza ka waqt rukhsat ki ghadi hai
zara thahro ki ye manzil kadi hai
jise tum chhod kar rukhsat hue the
wo basti aaj tak suni padi hai
abhi tak dil ke virane mein jaise
tamanna hath phailae khadi hai
mere dushman bhi ab to aa rahe hain
tumhein kis waqt jaane ki padi hai
tumhaare dard-mandon ki khabar le
gham-e-dauran ko aisi kya padi hai
kisi ki yaad 'saif' aur dil ki haalat
ghana jangal akeli jhonpadi hai

kuchh to rangini-e-afkar khule

By

kuchh to rangini-e-afkar khule
'saif' chal matla-e-anwar khule
barg-e-gul jaise hawa ke rukh par
kis latafat se lab-e-yar khule
tu zara band-e-qaba khol to de
jauhar-e-nafa-e-tatar khule
dekh ai kucha-e-jaanan ki hawa
dil ke darwaze kai bar khule
zakhm-e-dil hum ne chhupae warna
teri aankhon ne kiye war khule
wah kya dhang hain sayyaadon ke
log phirte hain giraftar khule
kya isi tarah guzar jaegi
kuchh to un par bhi dil-e-zar khule
hasrat-e-did pas-e-marg na puchh
rah gae dida-e-bedar khule
lab-e-khamosh ko wa kar zalim
ye hai iqrar ki inkar khule
saf bakhshe gae wo hashr ke din
jo nazar aae gunahgar khule
kabe ja kar bhi hamein kashf hua
but-kade mein bhi kuchh asrar khule
hum bhi qismat ka likha dekhenge
'saif' chal nama-e-dildar khule

kitna bekar tamanna ka safar hota hai

By

kitna bekar tamanna ka safar hota hai
kal ki ummid pe har aaj basar hota hai
yun main sahma hua ghabraya hua rahta hun
jaise har waqt kisi baat ka dar hota hai
din guzarta hai to lagta hai bada kaam hua
raat katti hai to ek marka sar hota hai
log kahte hain muqaddar ka nawishta jis ko
hum nahin mante har chand magar hota hai
'saif' is daur mein itna bhi ghanimat samjho
qaid mein rauzan-e-diwar bhi dar hota hai