tum ghalat samjhe hamein aur pareshani hai

By

tum ghalat samjhe hamein aur pareshani hai
ye to aasani hai jo be-sar-o-samani hai
khwahish-e-did sar-e-wasl jo nikli nahin thi
lamha-e-hijr mein tajrid ki uryani hai
kyun bhala bojh uthaun main tere khwabon ka
mere aaine mein kya kam koi hairani hai
ek muddat se jo baithi hai meri palkon par
khana-e-dil mein wo surat abhi anjaani hai
dub jata hai sar-e-sham hamara dil bhi
ye bhi suraj ki tarah raat ka zindani hai
khud ko hum bech ke ek khwab to le pae nahin
tere bazar mein kis chiz ki arzani hai
kis bharose pe main takraun hawa se 'sajjad'
gar bikharta hun to atraf mein sab pani hai

tujhe kho kar mohabbat ko ziyaada kar liya maine

By

tujhe kho kar mohabbat ko ziyaada kar liya main ne
ye kis hairat mein aaina kushada kar liya main ne
mujhe pechida jazbon ki kahani nazm karna thi
so jitna ho saka uslub sada kar liya main ne
mohabbat ka suna tha zat ki takmil karti hai
magar is aarzu mein khud ko aadha kar liya main ne
shikast-e-khwab par hi khwab ki buniyaad rakhna thi
dar-e-imkan phir se istada kar liya main ne
nai rut mein mohabbat ka iada chahta tha wo
purane tajarbe se istifada kar liya main ne
sar-e-sahil mujhe pichhe se ab aawaz mat dena
yahan se par jaane ka irada kar liya main ne

rahin-e-KHwab hun aur KHwab ke makan mein hun

By

rahin-e-khwab hun aur khwab ke makan mein hun
jahan mujh se siwa hai main jis jahan mein hun
ajab tarah ka khirad-khez hai junun mera
mujhe khabar hai main kis kar-e-raegan mein hun
tu mujh ko phenk chuka kab ka apne dushman par
main ab kaman mein nahin hun tere guman mein hun
meri thakan bhi teri hijraton mein shamil hai
main gard gard sahi tere karwan mein hun
ulajh pada tha main ek rose apne sae se
aur us ke baad akela hi dastan mein hun

lahr us aankh mein lahrai jo be-zari ki

By

lahr us aankh mein lahrai jo be-zari ki
hum ne hanste hue phir kuch ki tayyari ki
mujh ko jis raat samundar ne utara khud mein
main ne us raat bhi sahil ki taraf-dari ki
hum ne girye ko bhi aadab ke andar rakkha
apne aasab pe wahshat na kabhi tari ki
naqsh-e-pa dhundhta phirta hai sahar ka wo bhi
jis pe ek raat bhi guzri nahin bedari ki
raushni parda-e-mizgan se chhini jati hai
kis ne ye khwab-gah-e-dil mein ziya-bari ki
dil mein bhar laya hun mahrumi-e-duniya 'sajjad'
aaj bazar se phir main ne kharidari ki

khol kar baat ka bharam donon

By

khol kar baat ka bharam donon
kam-sukhan ho gae hain hum donon
ho gae ab juda to kya kahiye
the khata-kar besh-o-kam donon
jab milenge to bhul jaenge
jo abhi sochte hain hum donon
dafatan samna hua apna
ji uthe jaise ek dam donon
hijrat-o-hijr se bachae khuda
mujh ko lahaq hain aaj gham donon
ab yahi ek rah bachti hai
bas yahin rok len qadam donon
mujh pe guzra hai waqt-e-hijr-o-visal
dil ne dekhe hain zer-o-bam donon
jab nimat jaenge ye hangame
phir se ho jaenge baham donon