apne qasid ko saba bandhte hain

apne qasid ko saba bandhte hain
sach hai shaer bhi hawa bandhte hain
phir sar-e-dast mera khun hoga
phir wo hathon mein hina bandhte hain
gathri phulon ki wo ho jati hai
jin mein wo apni qaba bandhte hain
aji dekhen dil-e-ashiq to nahin
aap aanchal mein ye kya bandhte hain
ai 'sakhi' aaj to kuchh khair nahin
wo kamar ho ke khafa bandhte hain

baam par aata hai hamara chand

baam par aata hai hamara chand
aasman se kare kinara chand
aap hi ki talash mein sahab
gardishen karta hai gawara chand
khal aur rukh se kis ko dun nisbat
aise tare na aisa pyara chand
aag bhadki jo aatishin rukh ki
abhi ud jae ho ke para chand
hone to do muqabla un se
ghul karenge malak ki haara chand
charkh se un ko takta hai 'sakhi'
jaega ek roz mara chand