ye KHwab aur bhi dekhenge raat baqi hai

By

ye khwab aur bhi dekhenge raat baqi hai
abhi to ai dil-e-zinda hayat baqi hai
mere lahu mein abhi tark-e-ishq ke ba-wasf
wo garmi-e-nigah-e-iltifat baqi hai
abhi to zauq-e-talab mein kami nahin aai
abhi mera safar-e-be-jihat baqi hai
jo ho sake to shahadat-gah-e-nazar mein aa
ye dekh ishq mein kitna sabaat baqi hai
ye kaenat abhi ek intizar mein hai
ki hone wali koi wardat baqi hai
khud apni rakh se tu ji uthe sharar ki tarah
ye moajiza abhi ai kaenat baqi hai
shab-e-visal mein din bhi mila na len ai dost
ki raat khatm hui aur baat baqi hai
hui hai shakh-e-hunar mein nai numu ab ke
'salim' barg-e-khizan se najat baqi hai

wo log bhi hain jo maujon se Dar gae honge

By

wo log bhi hain jo maujon se dar gae honge
magar jo dub gae par utar gae honge
lagi ye fikr nai dil ko aa ke manzil par
kahan bhatak ke mere ham-safar gae honge
palat ke aankh mein wo mauj-e-khun nahin aai
chadhe hue the jo dariya utar gae honge
chale to ek hi raste pe hum magar na mile
mile bhi honge to bach kar guzar gae honge
jo maut se na dare wo bhi tere sath nahin
ki zindagi ke sawalon se dar gae honge
jahan ye bagh hai pahle yahan bayaban tha
zarur idhar se tere khush-nazar gae honge
jo shah-rahon pe dekhe hain log patthar ke
talab mein jine ki ye su-e-zar gae honge
hamari kisht-e-dil-o-jaan se us ki mizhgan tak
ye silsile tere ai chashm-e-tar gae honge
jo mil gaya hai to ab mujhe se haal-e-hijr na puchh
kisi tarah se wo din bhi guzar gae honge
'salim' zist to mushkil thi be-dayaron ki
watan se dur kahin ja ke mar gae honge

meri ghazal mein ek naya soz-e-jaan bhi hai

By

meri ghazal mein ek naya soz-e-jaan bhi hai
mana abhi girani-e-lafz-o-bayan bhi hai
kuchh dil bhi hai nashat-e-tamanna se shad-kaam
aur kuchh teri jafa pe karam ka guman bhi hai
kya is hujum-e-shauq se ghabra na jaega
mana wo bad-guman-e-wafa mehrban bhi hai
kuchh naz-e-tamkanat bhi hai pas-e-haya ke sath
phir bar-e-arzu se zara sargiran bhi hai
taklif-e-iltifat na dun us nigah ko
ba-wasf-e-jaur-o-naz jo aaram-e-jaan bhi hai
mail karam pe hai magar allah re ehtiyat
paiman-e-arzu se mere bad-guman bhi hai
us yar dil-shikan pe hain dildariyan bhi khatm
jo hum se sargiran bhi hai aur mehrban bhi hai
tu jis tarah sune ye hai tera moamla
gham amr-e-waqia bhi hai aur dastan bhi hai
kuchh 'askari' ka faiz bhi hai bais-e-ghazal
aur kuchh 'salim' meri tabiat rawan bhi hai

kin naqabon mein hai mastur wo husn-e-masum

By

kin naqabon mein hai mastur wo husn-e-masum
ai meri chashm-e-gunahgar tujhe kya malum
haal-e-dil qabil-e-izhaar nahin hai warna
mere chup rahne ka kuchh aur nahin hai mafhum
ajnabi hun main tere shahr-e-karam mein ai dost
kya hai is shahr ka dastur mujhe kya malum
dil-e-khush-fahm ye kahta tha bula lega koi
jab main uttha tha teri bazm se ho kar maghmum
wo shab-e-hijr wo aasar-e-sahar aur dil mein
dubti tutti mitti hui yaadon ka hujum
ek paikar hai khud se jise kahte hain wafa
husn-e-na-karda tamanna ko wafa kya malum
talib-e-dad-e-sukhan aap bhi hain kis se 'salim'
wo ki hain jis ki khamoshi mein bhi lakhon mafhum