aab o hawa hai barsar-e-paikar kaun hai

aab o hawa hai barsar-e-paikar kaun hai
mere siwa ye mujh mein giraftar kaun hai
ek raushni si rah dikhati hai har taraf
dosh-e-hawa pe sahib-e-raftar kaun hai
ek ek kar ke khud se bichhadne lage hain hum
dekho to ja ke qafila-salar kaun hai
bosidgi ke khauf se sab uth ke chal diye
phir bhi ye zer-e-saya-e-diwar kaun hai
qadmon mein sae ki tarah raunde gae hain hum
hum se ziyaada tera talabgar kaun hai
phaila raha hai daman-e-shab ki hikayaten
suraj nahin to ye pas-e-kohsar kaun hai
kya shai hai jis ke waste tute pade hain log
ye bhid kyun hai raunaq-e-bazar kaun hai
ai dil ab apni lau ko bacha le ki shahr mein
tu jal-bujha to tera aza-dar kaun hai
ab tak isi khayal se soe nahin 'salim'
hum so gae to phir yahan bedar kaun hai

ab faisla karne ki ijazat di jae

ab faisla karne ki ijazat di jae
ya phir hamein manzil ki bashaarat di jae
diwane hain hum jhut bahut bolte hain
hum ko sar-e-bazar ye izzat di jae
phir gard-e-mah-o-sal mein at jaenge
aaina banaya hai to surat di jae
israr hi karte ho to apna samjho
dena hi agar hai to mohabbat di jae
wo jis ne mujhe qatl pe uksaya tha
us shakhs se milne ki bhi mohlat di jae
jab meri gawahi bhi mere haq mein nahin
phir shahr mein kis kis ki shahadat di jae
hum jagte rahne ke bahut aadi hain
hum ko shab-e-hijran ki masafat di jae
chhid jae to tabqat ki ab jang 'salim'
kuchh bhi ho magar hum ko na zahmat di jae

abhi hairat ziyaada aur ujala kam rahega

abhi hairat ziyaada aur ujala kam rahega
ghazal mein ab ke bhi tera hawala kam rahega
meri wahshat pe sahra tang hota ja raha hai
kaha to tha ye aangan la-mahaala kam rahega
bhala wo husn kis ki dastaras mein aa saka hai
ki sari umr bhi likkhen maqala kam rahega
bahut se dukh to aise bhi diye tum ne ki jin ka
mudawa ho nahin sakta izala kam rahega
wo chandi ka ho sone ka ho ya phir ho lahu ka
'salim' ahl-e-hawas ko har niwala kam rahega