dil tujhe naz hai jis shaKHs ki dildari par

By

dil tujhe naz hai jis shakhs ki dildari par
dekh ab wo bhi utar aaya adakari par
main ne dushman ko jagaya to bahut tha lekin
ehtijajan nahin jaga meri bedari par
aadmi aadmi ko khae chala jata hai
kuchh to tahqiq karo is nai bimari par
kabhi is jurm pe sar kat diye jate the
ab to inam diya jata hai ghaddari par
teri qurbat ka nasha tut raha hai mujh mein
is qadar sahl na ho tu meri dushwari par
mujh mein yun taza mulaqat ke mausam jage
aaina hansne laga hai meri tayyari par
koi dekhe bhare bazar ki virani ko
kuchh na kuchh muft hai har shai ki kharidari par
bas yahi waqt hai sach munh se nikal jaane do
log utar aae hain zalim ki taraf-dari par

sal ki aaKHiri shab

By

sal ki aakhiri shab
mere kamre mein kitabon ka hujum
pichhli raaton ko tarashe hue kuchh mah o nujum
main akela mere atraf ulum
ek taswir pe bante hue mere khad-o-khal
in pe jamti hui gard-e-mah-o-sal
ek hayula sa pas-e-shahr-e-ghubar
aur mujhe jakde hue khud meri bahon ke hisar
koi rauzan hai na dar
so gae ahl-e-khabar
sal ki aakhiri shab
na kisi hijr ka sadma na kisi wasl ka khwab
kham hone ko hai bas aakhiri lamhe ka shabab
aur ufuq par dhundlakon se kahen
khulne wala hai nai subh ka bab
is nai subh ko kya nazr karun
har taraf phaila hua tez hawaon ka fusun
aur main sochta hun
dar-o-diwar mein lipte hue sahme hue log
gali-kuchon mein nikalte hue ghabraate hue
main unhen kaise bataun ki yahi mausam hai
jab parindon ke par-o-baal nikal aate hain

purane sahilon par naya git

By

samundar chandni mein raqs karta hai
parinde baadalon mein chhup ke kaise gungunate hain
zamin ke bhed jaise chand taron ko batate hain
hawa sargoshiyon ke jal bunti hai
tumhein fursat mile to dekhna
lahron mein ek kashti hai
aur kashti mein ek tanha musafir hai
musafir ke labon par wapsi ke git
lahron ki subuk-gami mein dhalte
dastan kahte
jaziron mein kahin bahte
purane sahilon par gunjte rahte
kisi manjhi ke naghmon se gale mil kar palatte hain
tumhaari yaad ka safha ulatre hain
abhi kuchh raat baqi hai
tumhaara aur mera sath baqi hai
andheron mein chhupa ek raushni ka hath baqi hai
chale aana
ki hum us aane wali subh ko ek sath dekhenge