wo pal

By

agar wo pal mujhe ek bar mil jae to main puchhun
ki ye sauda mere sar mein samaya kis liye tu ne
ye dard-e-la-dawa dil mein jagaya kis liye tu ne
khirad idrak aql-o-fahm sab begar hon jaise
farasat dur-bini aagahi bekar hon jaise
hawale istiare mashware dushwar hon jaise
dalael falsafe mantiq zehn par bar hon jaise
basirat hoshiyari ilm sab khamosh taswiren
na koi mashwara achchha na danish-mand tadbiren
musalsal be-kali diwangi hai khud-faramoshi
faqat ek be-khudi aathon pahar pur-kaif mad-hoshi
nazar har shakl mein dhunde usi dildar ki surat
har ek aawaz jaise sahab-e-awaz ki murat
samaat par nazar par soch par aaseb chhaya hai
har aahat par tamanna puchhti hai kaun aaya hai

simiya

By

tumhaari babat main sochta hun
to aisa lagta hai lafz sare
badan-darida o sar-burida
bayan-o-izhaar ke sahaare
ye lafz sare
mere takhayyul ki bargah-e-sukhan mein jaise
qatar-andar-qatar mahjub
pa-pyaada khade hue hain
tumhein jo sochun to lafz sochun
jo lafz sochun to aise paikar ka tarjuman
koi lafz sochun
jo aks-afgan ho ghamza-o-ishwa-o-ada ka
nazir ru-e-nigar-o-talat
khabir-e-bu-e-bahaar-o-nikhat
jo husn-e-sarmad ka aaina-gar
jo aariz-e-hur ka fusun-gar
jo lafz khushbu abir-o-ambar
jo lafz sandal shamim-e-muztar
jo lafz farhang-e-khamoshi ho
jo lafz aahang-e-be-khudi ho
jo lafz tandid-gar ho aisa
jo khal-o-khad ko kamal kah de
tumhein sarapa jamal kah de
jo lafz jadu ho kimiya ho
jo lafz afsun ho simiya ho
jo lafz tujh ko bayan kar de
wo lafz aakhir koi to hoga
wo lafz aakhir kahin to hoga

lab-e-tanur

By

main aksar raat ki tanhai se ye puchhta hun
ki mera aaj mere kal se kyunkar mukhtalif hai
wahi main hun wahi diwangi hai
wahi wahshat wahi fikr-e-maishat
ye bechaini ye virani
mujhe kyun khae jati hai
magar jazbon se aari dard se ghafil ye tanhai
sada khamosh rahti hai
mujhe lagta hai tanhai
faqat bahri nahin gungi bhi hai shayad
wahi gambhir sannata wahi viran tariki
bhala tanhai bhi kuchh bolti hai
magar badli se aksar
chand apna sar nikale
mujhe aawaz de kar puchhta hai
ki diwane tu ab tak jagta hai
ye kaisi fikr-e-roz-o-shab
ye kaisi girya-zari
sulagti dhime dhime
rakh banti raat
aakhir kat hi jaegi
magar tu koi tajir hai
na sahukar na baniya
to phir kyun aaj-kal mein bantta hai
dard ki daulat
ye wo sauda nahin
jo har kisi ko ras aa jae
kathin ho ya pur-asaish magar ye raat guzregi
shab-e-simwar guzasht lab-e-tanur guzasht

iztirab

By

kitni hi soi dopahron mein
kitni hi jalti raaton mein
har khwab adhura
mud mud kar
jaane kya dhunda karta hai
kuchh bhige pal
bojhal qadmon ki chap liye
hairan pareshan
puchhte hain
ye mod kahan tak jata hai
kuchh be-hangam si taswiren
dhundli dhundli
be-dol se kuchh lambe sae
viran humakti tanhai
ummid ke raushan-danon se
kya manzar dekha karti hai
sannate ke is shor mein bhi
mauhum si ek ummid kabhi
karwat karwat khud se puchhe
aawaz abhi jo gunji thi
wo bang-e-jaras thi
ya koi
pazeb kahin takrai hai

hisar-e-tirgi

By

khwahishon ke lams mein dubi hui
daeron mein ghumti tanhaiyan
ihtibas-o-jabr ki tarik shab
muztarib ranjur gandum-gun sahar
aisa lagta hai andhera kah raha ho zer-e-lab
ai kabud-o-kor-chashm ai lain
tujh ko bakhshi thi kiran az-rah-e-dil-sozi magar
tu samajhta hai ki ye jud-o-sakha lutf-o-ataf
tera istehqaq hai aur tu khuda-e-aftab
jal bujhe muddat hui teri khudai ke diye
bhag jitna bhagna hai zulmaton ke qahr se
ho sake to phir jala bisri mohabbat ke charagh
marg-bar-alam mein ek ummid ki mubham kiran
ek bujhte dip ka maddham hirasan irtiash
kaun jaane in charaghon ki ziya kab tak chale

bhaTka musafir

By

main jab chhota tha
apni man se aksar
zid ye karta tha
sunao dopahar mein
tum mujhe koi kahani
koi aisi kahani
jis mein shahzadi ho
tum jaisi
koi aisi kahani
simiya-gar
jis mein shahzada ho
mujh jaisa
wo kahti be-khabar
malum bhi hai
sunata hai agar
dopahar mein koi kahani
to bechaare musafir
ghar ka rasta bhul jate hain
mein ab bachcha nahin
man bhi nahin
na koi pariyon ki kahani
bas ek khwabon ki nagri
aur ek bhatka musafir