shabih-e-ruh kuchh aise nikhaar di gai hai

shabih-e-ruh kuchh aise nikhaar di gai hai
ana faqiron ke kase pe war di gai hai
tumhaare dil pe bhi kuchh to asar hua hoga
gire-pade hue lafzon ko dhaar di gai hai
hamari aankh ke aansu subut hain is ka
hansi hamare labon ko udhaar di gai hai
mere badan ke qafas aasman se phir is bar
zawal-e-subh ki surkhi guzar di gai hai
buland-qamati chubhne lagi thi duniya ko
so mere kandhon se gardan utar di gai hai
numu ke aakhiri imkan dhundhne ke liye
mujhe zamin bhi khalaon ke par di gai hai
tawil hijr ki muddat bhi hum faqiron ko
khulus-e-dil se ba-sad ikhtisar di gai hai
hamari ruh to kachche makan mein khush thi
to kyun badan ko hayat-e-mazar di gai hai

mazhab ki kitabon mein bhi irshad hua main

mazhab ki kitabon mein bhi irshad hua main
duniya teri tamir mein buniyaad hua mein
sayyaad samajhta tha riha ho na sakunga
hathon ki nasen kat ke aazad hua main
uryan hai mere shahr mein tahzib ki dewi
mandir ka pujari tha so barbaad hua main
mazmun se likhta hun kai dusre mazmun
duniya ye samajhti hai ki naqqad hua main
har shakhs hiqarat se mujhe dekh raha hai
jaise kisi mazlum ki fariyaad hua main

KHarab ho gaya jab mere jism ka kaghaz

kharab ho gaya jab mere jism ka kaghaz
to meri ruh ne pahna hai dusra kaghaz
guzar di hai yun hi jodte ghatate hue
sawal hal na hue aur bhar gaya kaghaz
gharib-e-shahr hun ghar hai na karobar koi
kabhi bichhata kabhi odhta raha kaghaz
huruf raqs-kunan ho gae achanak hi
labon se apne jo us ne kabhi chhua kaghaz
wo din bhi yaad hain hum ko tumhaare hijran mein
hamare beach mein jab rabta bana kaghaz
use jo naw banaya to gharq-e-ab hua
kuchh aur der to lahron se khelta kaghaz
adalaton mein bhi jhuti gawahiyon ke liye
tamam-umr zaban kholta raha kaghaz
futur zehn mein bhar kar hawas ke nezon par
uchhaalta raha hum ko haram ka kaghaz

faza-e-zehn ki jalti hawa badalne tak

faza-e-zehn ki jalti hawa badalne tak
main bujh na jaun lihaf-e-ana badalne tak
charagh-e-jism mein is bar bujh na jaun main
hawa-e-khema-e-shab ki rida badalne tak
phir aaj kufe se hijrat bahut zaruri hai
palat ke aaenge aab-o-hawa badalne tak
ajib log hain duniya teri hawas ke liye
tule hue hain khud apna khuda badalne tak
kashid karte hain zindan ki wadiyon se umid
qafas badalne hain zanjir-e-pa badalne tak
usul kanp rahe the badan ki bhatti mein
qanaaton ki mukammal faza badalne tak
mere lahu ka namak chakh liya hai us ne bhi
wo khush rahega bahut zaiqa badalne tak
safed barf pe nachi bahaar ji-bhar ke
nizam-e-qudrat-e-kohna ki ja badalne tak

amir-e-shahr ke aangan mein jab ujale hue

amir-e-shahr ke aangan mein jab ujale hue
na jaane kitne gharon ke charagh kale hue
isi zamin ke khuda qabr-gah mein apni
hain apni jism ki mitti pe khak dale hue
tumhaari fikr ki kotah-qad haweli mein
bujhe charagh to phir makdiyon ke jale hue
mukhalifin ka ab shaghl ho gaya hai yahi
uchhaalte hain ye jumle mere uchhaale hue
ajib baat hai khud meri aastin ke sanp
mujhi ko ghurte rahte hain sar nikale hue
hamare shahr mein lafzon ki khetiyan hain bahut
qadim log hain sare lughat khangale hue
ye ahl-e-fan mein bhi kide nikal dete hain
hasad ka tauq jo hain gardanon mein dale hue

gai nahin tere zulm-o-sitam ki KHu ab tak

gai nahin tere zulm-o-sitam ki khu ab tak
tapak raha hai meri aankh se lahu ab tak
na jaane kab se hai mere labon pe tera nam
isi sabab se to tuta nahin wuzu ab tak
tamam umr gulistan mein kat gai lekin
hua nahin mujhe aur ek rang-o-bu ab tak
kisi bhi sher ko hasil hui na zarkhezi
main dhundhta raha sahraon mein numu ab tak
khuli sarae ke jaisa hai ye badan apna
aur is sarae mein chalti rahi hai lu ab tak
tasawwuraat ke khemon ko raushni mil jae
isi khayal ki hai dil mein aarzu ab tak
kiye the 'shauq' jo mere jawan bete ne
wo dil ke chaak hue hi nahin rafu ab tak