wahm jaisi shukuk jaisi chiz

By

wahm jaisi shukuk jaisi chiz
umr hai bhul-chuk jaisi chiz
kaise rakkhen zamir ko mahfuz
pet mein le ke bhuk jaisi chiz
ghol di hai ghazal ke lahje mein
main ne koyal ki kuk jaisi chiz
dard ban kar teri judai ka
dil mein uthti hai huk jaisi chiz
kash hoti hasin logon mein
koi husn-e-suluk jaisi chiz
maslahat ki bina pe log 'salim'
chat lete hain thuk jaisi chiz

kabhi surKHi se likhta hun kabhi kajal se likhta hun

By

kabhi surkhi se likhta hun kabhi kajal se likhta hun
main dil ki baat jazbon ki hari konpal se likhta hun
main tera nam jab likhta hun apne dil ki takhti par
gulab-o-mushk se zamzam se ganga-jal se likhta hun
bujha kar zahr se rakkhe hain yaron ne qalam apne
magar main to wahi kewde se aur sandal se likhta hun
khushi ki dastan banjar zaminon ki hatheli par
gulabi nur barsate hue baadal se likhta hun
'salim' aati hai jab sachchai likhne ki meri bari
fasil-e-shahr par jalti hui mashal se likhta hun

ek hi zinda bacha hai ye nirala pagal

By

ek hi zinda bacha hai ye nirala pagal
jhut ke shahr mein sach bolne wala pagal
hathon mein phul liye aae hain sab log jahan
le ke aaya hai wahan panw ka chhaala pagal
us ki aankhon mein ajab nur tha danai ka
tum ne mahfil se jise kah ke nikala pagal
dhup hai phaili hui sharq se ta-gharb magar
bantta phirta hai duniya ko ujala pagal
jis mein rakkhe hun mohabbat ke khazane bhar kar
is tijori ko lagate nahin tala pagal
kaun samjhae teri sar-phiri kashti ko 'salim'
khunin dariya se pada hai tera pala pagal

bana degi zamin ko aaj shayad aasman barish

By

bana degi zamin ko aaj shayad aasman barish
ki dhoe ja rahi hain ghar ki sari khidkiyan barish
nae sadmat ka sailab aaya dil ki basti mein
nigal jae na teri yaad ki ye kashtiyan barish
khuli jo aankh to chehre pe jagmag thi phuwaron ki
ki milne aai thi kal raat mujh se na-gahan barish
badan se jab alag karti ho tum bhige hue kapde
chhama-chham nachti hai jangalon ke darmiyan barish
'salim' aankhon se sahraon ka khali-pan tapakta hai
mere andar barasti hai kahin ban kar dhuan barish

ajab hain surat-e-haalat ab ke

By

ajab hain surat-e-haalat ab ke
hui barsat mein barsat ab ke
badan mein phul bhi chubhne lage hain
bahut nazuk hain ehsasat ab ke
zara chaukanna chaukanna hun main bhi
hai duniya bhi lagae ghat ab ke
bana dunga tere chehre ka jhumar
laga jo chand mere hath ab ke
lagi hai shart mere aansuon ki
samundar ko milegi mat ab ke
'salim' alfaz bude lag rahe hain
hai aisi shiddat-e-jazbaat ab ke