shahr mein jab bhi zuleKHa se KHaridar aae

shahr mein jab bhi zulekha se kharidar aae
kitne yusuf the ki khud hi sar-e-bazar aae
chhed di qamat-o-gesu ki hikayat hum ne
kisi surat se to zikr-e-rasan-o-dar aae
jab bhi zindan mein asiron ko mila muzhda-e-gul
meri nazron mein tumhaare lab-o-rukhsar aae
dusri rah-e-wafa mein koi manzil hi na thi
jo teri bazm se utthe wo sar-e-dar aae
jab kya tark-e-tamanna ka irada hum ne
samne kitne hi tute hue pindar aae
hosh-mandon ne saja li gham-e-dil ki mahfil
hum se diwane sar-e-anjuman-e-dar aae
hum se sikhe koi aadab qadah-noshi ke
hum ki maikhane mein ghafil gae hoshiyar aae
ghaur se dekh sukhan-fahmon ke chehre 'sarshaar'
kitne is shakl mein 'ghaalib' ke taraf-dar aae

kya hua hum pe jo is bazm mein ilzam rahe

kya hua hum pe jo is bazm mein ilzam rahe
sahib-e-dil to jahan bhi rahe badnam rahe
koi taqrib to ho dil ke bahalne ke liye
tu nahin hai to tera zikr tera nam rahe
hum ko to ras hi aai kisi kamsin ki wafa
hae wo log mohabbat mein jo nakaam rahe
is irade se uthaya hai chhalakta hua jam
hum rahen aaj ki ye gardish ayyam rahe
be-sabab koi nawazish nahin karta 'sarshaar'
dekhen kya un ki inayat ka anjam rahe

KHayal hijr-e-musalsal mein aae hain kya kya

khayal hijr-e-musalsal mein aae hain kya kya
meri wafa ke qadam dagmagae hain kya kya
na sirf husn ki masumiyat pe the ilzam
khulus-e-ishq pe bhi harf aae hain kya kya
junun ke nam pe shorish ki tohmaten rakh kar
khirad ne khud bhi to fitne uthae hain kya kya
is ek nazar se ba-zahir jo multafit bhi na thi
meri nigah ne paigham pae hain kya kya

ishq tak apni dastaras bhi nahin

ishq tak apni dastaras bhi nahin
aur dil mail-e-hawas bhi nahin
ab kahan jaenge kharab-e-bahaar
aashiyan bhi nahin qafas bhi nahin
barq ki bekasi ko rota hun
ab nasheman mein khar-o-khas bhi nahin
kis ne dekha shaguftagi ka maal
zindagi itni dur-ras bhi nahin
hum asiron ke waste sarshaar
rasm-e-pabandi-e-qafas bhi nahin

zarra

By

dasht ki be-payan wusat mein
kohsaron ke daman mein
zarra
apne hone aur na hone ka dukh jhel raha tha
zarra jo khud apne wajud mein
ek mukammal duniya hai
jis ke batn mein
sara nizam-e-shams-o-qamar poshida hai
jis ki wahdat ke sine mein
nazar na aane wali kasrat ka jalwa hai
ahl-e-nazar ne pichhli sadi mein
is pamal zamir ke andar
is be-nam wajud mein muzmar
us taqat ki gawahi di hai
jo is ke bedar khamir mein
sadiyon tak khwabida rahi hai
ahl-e-hunar ahl-e-hikmat ne
jab is khufta quwwat ka idrak kiya
zarre ka dil chaak kiya
sadiyon ki sahmi hui
na-asuda mahrumi ko be-bak kiya
isi tawanai ki badaulat
isi haqir se be-tauqir se
khakistar zarre ne
ek din
hiroshima ko khak kiya