kis par poshida aur kis pe ayan hona tha

By

kis par poshida aur kis pe ayan hona tha
kaun hun main mujh ko is waqt kahan hona tha
tum kahan us kunj-e-azar mein khoi hui ho
tum ko to mere bachche ki man hona tha
is se pahle kahan the hum kis khwab mein the
hum donon ko ek safar pe rawan hona tha
aaine ko sabz kiya meri aankhon ne
mujh se hi ye kar-e-shisha-garan hona tha

ek pul banaya ja raha hai

By

main un se puchhta hun:
pul kaise banaya jata hai
pul banane wale kahte hain:
tum ne kabhi mohabbat nahin ki
main kahta hun: mohabbat kya chiz hai
wo apne auzar rakhte hue kahte hain:
mohabbat ka matlab jaanna chahte ho
to pahle dariya se milo
ru-e-zamin par dariya se zyaada mohabbat karne wala koi nahin
dariya apne samundar ki taraf bahta rahta hai
ye supurdagi hai
ye supurdagi bachpan hai aur bachpan bahisht
lekin bahisht tak pahunchne ke liye ek jahannam se guzarna padta hai
main puchhta hun jahannam kya hai?
wo kahte hain: is sawal ka jawab darakhton ke pas hai
koi bhi mausam ho wo apni jagah nahin chhodte
unhen mitti se mohabbat hai
unhen parindon aur chiyuntiyon se mohabbat hai
jo un ke jism mein ghar banati hain
'ghar kya hai?' main puchhta hun?
wo sab hansne lagte hain
pahla mazdur kahta hai:
apni aurat ki taraf jao
har sawal ka jawab mil jaega

ek roz main bhi bagh-e-adan ko nikal gaya

By

ek roz main bhi bagh-e-adan ko nikal gaya
todi jo shakh-e-rang-fishan hath jal gaya
diwar o saqf o baam nae lag rahe hain sab
ye shahr chand roz main kitna badal gaya
main so raha tha aur meri khwab-gah mein
ek azhdaha charagh ki lau ko nigal gaya
bachpan ki nind tut gai us ki chap se
mere labon se naghma-e-subh-e-azal gaya
tanhai ke alao se raushan hua makan
'sarwat' jo dil ka dard tha naghmon mein dhal gaya

qasam is aag aur pani ki

By

qasam is aag aur pani ki
maut achchhi hai bas jawani ki
aur bhi hain riwayaten lekin
ek riwayat hai khun-fishani ki
jise anjam tum samajhti ho
ibtida hai kisi kahani ki
ranj ki ret hai kinaron par
mauj guzri thi shadmani ki
chum lin meri ungliyan 'sarwat'
us ne itni to mehrbani ki