jo log rah gae hain meri dastan se dur

By

jo log rah gae hain meri dastan se dur
kuchh is jahan se dur hain kuchh us jahan se dur
har dastan-e-gham hai meri dastan se dur
jaise ki koi qais ho aah-o-fughan se dur
tu gar nahin hai pas to kya ranj mujh ko hai
ye zindagi kahan hai teri dastan se dur
jab tak tere visal ki surat nahin koi
ji dhundhta hai ghar koi donon jahan se dur
hai teri kahkashan bhi meri kahkashan ke pas
tera falak kahan hai mere aasman se dur
har sans us ke pyar ko sajda kiye gaya
'sarwar' kabhi raha hi nahin apni man se dur

zauq-e-suKHan ko ab to tere aag lagana achchha hai

By

zauq-e-sukhan ko ab to tere aag lagana achchha hai
muflis ghar ki haalat hai aur sher sunana achchha hai
meri sachchi chahat dekhi kah baitha wo mahfil mein
mere sab diwanon mein se ye diwana achchha hai
tir-e-nazar se aisa mare dil ka panchhi tab na le
duniya ghar ke sayyaadon se us ka nishana achchha hai
shaikh to masjid mein jata hai andar se dil kala hai
sachche aabid jahan khade hun wo but-khana achchha hai
aisi chaal kahan duje ki kyun tu aisa kahta hai
waise tu ne parde mein mujh ko pahchana achchha hai
auron ko talqin kare hai lekin 'sarwar' naseh ka
mai-khane mein chupke chupke aana-jaana achchha hai

yar ki mahfil saji mai ki mahak chhane lagi

By

yar ki mahfil saji mai ki mahak chhane lagi
zehn-o-dil mein ye kahan se raushni aane lagi
aa gale lag ja mere shamshir-e-qatil is dafa
id kyun har bar meri raegan jaane lagi
tera shikwa hai hina hathon pe kyun chadhti nahin
itni muddat ho gai jab tu mere shane lagi
din guzare the ye kah kar ab na sochunga use
phir bahaar-e-id aai un ki yaad aane lagi
ek muddat baad 'sarwar' gulshan-e-hasti mein ab
phir bahaar-e-id aai un ki yaad aane lagi

tumhaare pyar mein til til ke marta jita jata hun

By

tumhaare pyar mein til til ke marta jita jata hun
katora zahr ka har gam pe main pita jata hun
bahaar-e-ishq ke imkan bilkul ab numayan hain
gareban chaak ho jata hai us ko sita jata hun
kabhi tishna-labi sahra mein ek dam se bhadakti hai
hawa ke sath main sahra ka sahra pita jata hun
tumhein fathen mubarak hon farebi zehn ke sadqe
main jangen haar jata hun magar dil jita jata hun

phul khile hain mausam badla sahra ke viranon ka

By

phul khile hain mausam badla sahra ke viranon ka
qatra qatra khun jo tapka zakhmon se diwanon ka
bahal bahal ke ishq mein nazuk dil tuta diwanon ka
tab kuchh kaam chala aankhon ke dariya mein tufanon ka
gham ki mai mein gham ka qissa khub chhida afsanon ka
dukh mein dil ka dard hai dohra diwane diwanon ka
farsh ka qissa jiyun jiyun pahuncha baam pe saqi jhum utha
kis ne naqsha aisa badla duniya ke mai-khanon ka

mohabbat mein koi tanha safar achchha nahin lagta

By

mohabbat mein koi tanha safar achchha nahin lagta
jo aaun laut kar to apna ghar achchha nahin lagta
usulan pyar aur nafrat hamesha sath rahte hain
teri galiyon se logon ka guzar achchha nahin lagta
unhen to qatl karne par sawab-e-khuld milta hai
unhin ko pyar ka ek bhi shajar achchha nahin lagta
zamane-bhar ke tum ko naz-o-nakhre kyun uthane hain
khuda se ho na wabasta to dar achchha nahin lagta
tumhaare kan ke jhumar mein ho to dil uchhal jae
tumhaari aankh mein jaanan guhar achchha nahin lagta