kuchh bhi na ab kahenge qafas mein zaban se hum

kuchh bhi na ab kahenge qafas mein zaban se hum
sayyaad ko rulaenge aah-o-fughan se hum
mayusiyon ke shahr mein lagta nahin hai dil
le jaen apne dil ko kahan is jahan se hum
gulshan jahan jahan hain wahin bijliyan bhi hain
jaen nikal ke dur kahan aasman se hum
imshab mizaj-e-yar mein kuchh barhami si hai
guzre hain bar bar isi imtihan se hum
dete rahe fareb mohabbat ke raste
pahunche hain phir wahin ki chale the jahan se hum
wo le gae hain chand-sitaron ki raushni
kahte rahe fasana-e-gham aasman se hum
khairaat-e-husn kasa-e-'rizwi' mein dal de
kuchh le ke hi uthenge tere aastan se hum

shama raushan koi kar de mere gham-KHane mein

shama raushan koi kar de mere gham-khane mein
jaane kab se yahan baitha hun sanam-khane mein
lazzat-e-sozish-e-gham jaan-e-wafa aah na puchh
kitni taskin mili aap ko tadpane mein
khirman-e-dil pe giri hai to koi baat nahin
dar hai kaundi na ho bijli tere kashane mein
dil mein ab koi bhi hasrat nahin arman nahin
kuchh nahin kuchh bhi nahin ab mere gham-khane mein
main hi aaraish-e-afsana bana aah magar
ab mera nam nahin aap ke afsane mein
yun bhi aksar teri aawaz suni hai main ne
siskiyan leta ho jaise koi virane mein
aap laen to ye daman meri aankhon ke qarib
main bhi kuchh pesh karun aap ko nazrane mein
kitni masum si pyari si khata kar baithe
bhul 'rizwi' se hui hai koi anjaane mein

mujhe mushkil mein yun andaza-e-mushkil nahin hota

mujhe mushkil mein yun andaza-e-mushkil nahin hota
kabhi main kasrat-e-afkar se bad-dil nahin hota
agar hona pade mannat-kash-e-amwaj bhi mujh ko
tu phir meri khudi ko kuchh gham-e-sahil nahin hota
nahin kuchh pas-e-ghairat jis ko us ka zikr hi kya hai
jo ghairat-mand hai wo dar-ba-dar sail nahin hota
jhuka karti hain wo shakhen jo hoti hain samar-awar
wahi hota hai khud-sar jo kisi qabil nahin hota
lahu ki tere har har bund fariyaadi hai go bismil
magar qatil ke munh par shikwa-e-qatil nahin hota
dil-e-nakaam phir le kaam zauq-e-sai-e-paiham se
kaf-e-afsos malne se to kuchh hasil nahin hota
yaqinan maqsad-e-takhliq ko samjha hua hai wo
faraez se kabhi jo aadmi ghafil nahin hota
wo insan hai malak sajde guzaren jis ke daman par
wo zarra kya jo ham-dosh-e-mah-e-kaamil nahin hota
jo roe dekh kar har har qadam par panw ke chhaale
kabhi wo rah-rau aasuda-e-manzil nahin hota
mere soz-e-darun meri nawa ka faiz hai 'rizwi'
tera hona to wajh-e-garmi-e-mahfil nahin hota

kuchh bhi na ab kahenge qafas mein zaban se hum

kuchh bhi na ab kahenge qafas mein zaban se hum
sayyaad ko rulaenge aah-o-fughan se hum
mayusiyon ke shahr mein lagta nahin hai dil
le jaen apne dil ko kahan is jahan se hum
gulshan jahan jahan hain wahin bijliyan bhi hain
jaen nikal ke dur kahan aasman se hum
imshab mizaj-e-yar mein kuchh barhami si hai
guzre hain bar bar isi imtihan se hum
dete rahe fareb-e-mohabbat ke raste
pahunche hain phir wahin ki chale the jahan se hum
wo le gae hain chand-sitaron ki raushni
kahte rahe fasana-e-gham aasman se hum
khairaat-e-husn kasa-e-'rizwi' mein dal de
kuchh le ke hi uthenge tere aastan se hum

kabhi to ishq mein un ke sadaqat aa hi jaegi

kabhi to ishq mein un ke sadaqat aa hi jaegi
kabhi to un ke dil mein meri chahat aa hi jaegi
abhi to mere arman khun ke aansu bahate hain
kabhi to dil ke un zakhmon ko rahat aa hi jaegi
mere gulshan ka har ek phul murjhaya hua sa hai
kabhi kaliyon ke lab par muskurahat aa hi jaegi
ye dar hai be-rukhi ka wo gila shikwa na kar baithen
kisi din un ke honton par shikayat aa hi jaegi
abhi wo aazmate hain unhen kuchh na kaho 'rizwi'
kisi din un ki chahat mein qayamat aa hi jaegi

jo hona hai wahi hota rahega

jo hona hai wahi hota rahega
kabhi hansta kabhi rota rahega
bacha koi mukafat-e-amal se
wahi katega jo bota rahega
kuchh apna hi bigadega agar tu
bharam apna miyan khota rahega
tere aada nikal jaenge aage
agar tu raat-din sota rahega
tu apna bar-e-isyan kam se kam kar
kahan tak bojh ye dhota rahega
koi had bhi hai aakhir aansuon se
kahan tak apna munh dhota rahega
kahin tadbir se talta hai 'rizwi'
likha taqdir ka hota rahega