phir aa gaya zaban pe wahi nam kya karen

phir aa gaya zaban pe wahi nam kya karen
tu hi bata ai gardish-e-ayyam kya karen
ek pal ko lab pe aai hansi phir palat gai
yaad aa gaya ho jaise koi kaam kya karen
har aarzu ke hont zamane ne si diye
bujhne laga charagh sar-e-sham kya karen
dar hai ki tere hath se saghar na chhin len
hum tishna-lab ai saqi-e-gulfam kya karen
aao musafiran-e-adam aao ghar chalen
manzil hamari dur hai aaram kya karen
rukh par kali ke jab padi tharra gai nazar
dekha hai har bahaar ka anjam kya karen
'simab' hum ko chain milega na umr-bhar
hum to hain iztirab mein badnam kya karen

kis taraf se aa rahi hain dard ki purwaiyan

kis taraf se aa rahi hain dard ki purwaiyan
aag si dene lagi hain bhigti angnaiyan
main kahan tha jab farishton ne khushi insan ko di
kyun mere hisse mein aaen sirf ashk-araiyan
ye shabab-o-husn tera aur ye naz-o-ada
tutti hain donon hathon se teri angdaiyan
main kahan ja kar chhupun ai gardish-e-dauran bata
dhund leti hain mujhe har-ja meri ruswaiyan
ek shikasta saz hai aur ek sada-e-dard-e-dil
hum hain tum ho bekasi hai gham hai aur tanhaiyan
mujh ko chaara do dawa mat de main ji kar kya karun
ye dua kar mujh ko das len maut ki parchhaiyan
hum ne kya socha tha aur 'simab' ye kya ho gaya
bajte bajte ruk gain kyun sab ki sab shahnaiyan

jab bhi bhule se kabhi lab pe hansi aai hai

jab bhi bhule se kabhi lab pe hansi aai hai
gham ki taswir mere zehn pe lahrai hai
is qadar charcha hai kuchh aamad-e-fasl-e-gul ka
khar ko khar na kahne hi mein danai hai
ban gai khar sar-e-shakh kali wo ek din
phul banne ki tamanna mein jo murjhai hai
aankh ne dekha nahin ek bhi gul khanda-ba-lab
sirf kanon ne suna hai ki bahaar aai hai
din to sayon ke taaqub mein guzara lekin
phir wahi raat wahi main wahi tanhai hai
jab tha main garm-e-safar sayon se katraata tha
thak gaya hun to mujhe shoalon pe nind aai hai
go main begana hun khud zat se apni 'simab'
meri fitrat mein magar anjuman-arai hai

dil pe jab tera tasawwur chha gaya

dil pe jab tera tasawwur chha gaya
zindagi ka aaina dhundla gaya
umr-bhar koi khushi aai na ras
ruth kar us dil se to achchha gaya
aadmi ke aaine mein dekh kar
apni surat se khuda sharma gaya
main to ro ro kar sada khulta raha
tu ai gul hansne pe bhi murjha gaya
de ke koi muskurahat ka kafan
aarzu ko dil mein hi dafna gaya
le ke aae the muqaddar qais ka
sath apne har jagah sahra gaya
dil to tha shishe ka go 'simab' ka
pattharon ke shahr mein pathra gaya

allah de sake to de aisi zaban mujhe

allah de sake to de aisi zaban mujhe
apna samajh ke dil se laga le jahan mujhe
sehn-e-chaman se jab bhi utha hai dhuan kabhi
yaad aa ke rah gaya hai mera aashiyan mujhe
khar-e-nafas ne mujh ko na sone diya kabhi
ek umr maut deti rahi loriyan mujhe
main ek charagh lakh charaghon mein bat gaya
rakkha jo aainon ne kabhi darmiyan mujhe
main aane wale qafile ka mir ban gaya
chhoda tha sathiyon ne pas-e-karwan mujhe
har mauj se ulajhti hui khelti hui
sahil pe lai kashti-e-umr-e-rawan mujhe
'simab' dasht-e-zist se main kya karun gila
bakhshi hain bastiyon ne bhi viraniyan mujhe

aangan se hi KHushi ke wo lamhe palaT gae

aangan se hi khushi ke wo lamhe palat gae
sahra-e-dil se barse baghair abr chhat gae
rishton ka ek hujum tha kahne ko aas-pas
jab waqt aa pada to talluq simat gae
ek samt tum khade the zamana tha ek samt
hum tum se mil gae to zamane se kat gae
rasm-o-rah-e-jahan ka to tha daera wasia
apni hadon mein aap hi hum log bat gae
hamdardiyon ki bhid sahar se thi sath sath
jab dhup sar pe aai to sae simat gae
bedariyon ke sath tha hangama-e-hayat
nind aa gai to sare masail nipat gae
is inqalab-e-daur-e-taraqqi ke aafrin
majma bada hua hai to insan ghat gae