hairani ka bojh

By

mitti ki diwar pe ek khunti se latki
meri yaadon ki zambil
jis mein chhupe the
rang-birange kapdon ke bosida katran
gol gol si nannhi munni kar dhaniyon ke dane
ek amrud ki dali kat ke baba ne jo banai thi
wo tedhi-medhi ek ghulail
nile pile matiyale aur lal paron ki dheri
chaude munh ka ek munh zor sa kath ka adiyal ghoda
apni akad mein khata hua bagghi wale ka koda
itni muddat baad jo kholi main ne wo zambil
ek nanha is mein se nikal kar jaise sarpat bhaga
dekhta tha pichha hi wo apna aur na apna aaga
aur ulajhta jata jitna khulta lipta dhaga
jaise bhayanak sapne dekhe kai dinon ka jaga
ab ke phir wo nazar aaya to sargoshi mein puchhunga
tum to mere yar the phir kyun
salon sal nahin milne ko
apne shuur ki hairani ka bojh uthae
jaane kitni kathin rahon se guzarte ho
jag walon par hanste ho ya chhup chhup aahen bharte ho
basti chhod ke jangal jangal rain basera karte ho
ya phir ek patal ki nichli tah mein utar ja marte ho
shayad tum bhi gautam ho aur apne aap se darte ho

zindagi hai muKHtasar aahista chal

zindagi hai mukhtasar aahista chal
kat hi jaega safar aahista chal
ek andhi daud hai kis ko khabar
kaun hai kis rah par aahista chal
dida-e-hairan ko ek manzar bahut
yun hi nazzara na kar aahista chal
tez-gami jis shikam ki aag hai
us se bachna hai hunar aahista chal
jo tag-o-dau se teri hasil hua
rakh kuchh us ki bhi khabar aahista chal
roz o shab yun waqt ka daman na khench
do ghadi aaram kar aahista chal

yun ulajh kar rah gai hai tar-e-pairahan mein raat

yun ulajh kar rah gai hai tar-e-pairahan mein raat
be-dili ke sath ab utregi jaan-o-tan mein raat
khol kar baadal ke darwaze nikal aaya hai chand
gir padi hai raqs karte karte phir aangan mein raat
baat kya hai kashtiyan khulti nahin sahil se kyun
khwar o aawara si hai apne adhure-pan mein raat
kaam itne hain ki ab ye sochna bhi hai muhaal
kis kashakash mein kata din kaun si uljhan mein raat
lut le jate hain sab dhanwan din ki raushni
aur tukde tukde bat jati hai har nirdhan mein raat
kar gain chhidkaw aankhen aaj 'shahin' is tarah
khil uthin murjhai kaliyon se bhare daman mein raat

ye bhi shayad tera eajaz-e-nazar hai ai dost

ye bhi shayad tera eajaz-e-nazar hai ai dost
shoala-e-dard mujhe ek gul-e-tar hai ai dost
teri aawaz to sahra mein bhatak jati hai
kis taraf jaun main tu jaane kidhar hai ai dost
hae ye be-sar-o-samani-o-be-tartibi
zindagi kya kisi mai-khwar ka ghar hai ai dost
kitne tufanon ko sar karti hai ek sham-e-wafa
aur wo sham-e-wafa dard-e-jigar hai ai dost
gar ho khwabida to patthar ke siwa kuchh bhi nahin
jag jae jo yahi dil to sharar hai ai dost
yun to gham zist ko be-rang bana deta hai
dil-jalon ka yahi sarmaye magar hai ai dost

thi kuchh na KHata phir bhi pasheman rahe hain

thi kuchh na khata phir bhi pasheman rahe hain
kya kya gham-e-haalat ke unwan rahe hain
khud jin ko na irfan tha taqdis-e-junun ka
wo bhi meri hasti ke nigahban rahe hain
jin ko meri har baat pe wahshat ka guman tha
wo meri khamoshi ka bura man rahe hain
dilchasp nazar aai thi ye rasm-o-rah-e-dil
par jaan ka ek rog hai ab jaan rahe hain
jo bhi hai use tangi-e-daman ka gila hai
ek ek ko hum dur se pahchan rahe hain