jaane kya wajh-e-beganagi hai

By

jaane kya wajh-e-beganagi hai
shahr mein jo bhi hai ajnabi hai
aag si mere dil mein lagi hai
phir bhi kitni khunuk chandni hai
raat-bhar shama tanha jali hai
tab kahin raat ja kar kati hai
un ko kho kar bhi main ji raha hun
ye kisi aur ki zindagi hai
zahr-e-gham kaam kar bhi chuka hai
muskurahat labon par wahi hai
tab ke jam raushan rakhoge
raat bhi ab to dhalne lagi hai
aaj to tum bhi so jao 'ishqi'
aaj to dard mein bhi kami hai

wo harf-e-shauq hun jis ka koi siyaq na ho

By

wo harf-e-shauq hun jis ka koi siyaq na ho
samajh sako na agar ishq ka miraq na ho
tere firaq se manus ho ke sochta hun
teri wafa ki tarah ye bhi ek mazaq na ho
juda na hon jinhen yarana ho judai ka
milen na wo jinhen milne ka ishtiyaq na ho
hazar shauq tera kam ho par khuda na dikhae
wo din ki teri judai bhi dil pe shaq na ho
bhala hua ki gham-e-ashiqi shiar kiya
wo kya kare jo kisi bhi hunar mein taq na ho

shahr-e-nigaran mein phirte hain hum aawara raat Dhale

By

shahr-e-nigaran mein phirte hain hum aawara raat dhale
shayad koi daricha wa ho shayad koi dip jale
koi gham-agin naghma chhede koi 'mir' ke sher padhe
kam kam dard ki kaliyan mahken pal pal gham ki raat dhale
viran viran dil ki basti suni suni rah-e-wafa
aise kathin raste pe koi do-chaar qadam to sath chale
chaak har ek gul ka daman aur aawara har mauj-e-saba
jaise mujh se mil na saka ho koi bichhadte waqt gale
khatm hua hai 'ishqi' tum par silsila-e-wahshat-zadagan
shayad koi shakhs tumhaare baad wafa ka nam na le

raat hai shahr-e-butan hai aur hum

By

raat hai shahr-e-butan hai aur hum
aarzu-e-be-karan hai aur hum
kaun guzra hai sar-e-rah-e-khayal
dur tak ek kahkashan hai aur hum
raat ki dhalti jawani ke rafiq
sirf ek pir-e-mughan hai aur hum
bujh chale hain sare yaron ke charagh
ab charaghon ka dhuan hai aur hum
har zamane mein mili haq ko salib
ye qamis-e-khun-chakan hai aur hum
be-sutun taqdir-e-har-farhad hai
ek mazaq-e-khusrawan hai aur hum
jis mein jurat ho wo mud kar dekh le
ek umr-e-raegan hai aur hum

raat bhi baqi hai sahba bhi shisha bhi paimana bhi

By

raat bhi baqi hai sahba bhi shisha bhi paimana bhi
aise mein kyun chhed na den hum zikr-e-gham-e-jaanana bhi
basti mein har ek rahta hai apna bhi begana bhi
haal kisi ne puchha dil ka dard kisi ne jaana bhi
hae tajahul aaj hamin se puchh rahe hain ahl-e-khirad
sunte hain is shahr mein rahta hai koi diwana bhi
aakhir saf tak aate aate har paimana chhalka hai
lekin hum tak aate aate tut gaya paimana bhi
jis se dil ka zakhm hara ho aisa koi zikr na chhed
jis mein us ka nam na aae aisa ek afsana bhi
shahr ki ranga-rang nigaro dil walon ki qadr karo
mahfil mein donon jalte hain shama bhi parwana bhi

phir usi shoKH ki taswir utar aai hai

By

phir usi shokh ki taswir utar aai hai
mere ashaar mein muzmar meri ruswai hai
dekhne deta nahin dur talak dil ka ghubar
jis se miliye wo khud apna hi tamashai hai
shahr mein niklo to hangama ki har zat ho gum
zat mein utro to ek aalam-e-tanhai hai
zakhm har sang hai us dast-e-hina ka ham-rang
khub us shokh ka andaz-e-pazirai hai
dil ne jab bhi koi sada si tamanna ki hai
zindagi ek naya zakhm laga lai hai
chaak dil lakh sahi chaak gareban bhi karo
iltifat us ka ba-andaza-e-ruswai hai