saneha ho ke raha chashm ka murjha jaana

By

saneha ho ke raha chashm ka murjha jaana
khwab lagta hai tera khwab mein bhi aa jaana
aankh ta-der rahi mauja-e-gham-nak mein tar
hasan ka khel tha aaine ko chamka jaana
tu sar-e-baam hawa ban ke guzarta kyun hai
mere malbus ki aadat nahin lahra jaana
dasht ke lab pe hai is qatra-e-naisan ka maza
tu kahan jaan saka main ne tujhe kya jaana
tukhm bota hai koi hath meri mitti mein
mujh ko aasan hai bahut chhanw ka phaila jaana

mile jo naqa-e-wahshat ko sarban koi

By

mile jo naqa-e-wahshat ko sarban koi
dikhaun qafila-e-khwab ka nishan koi
khamoshiyon hi se mashrut hai janam mera
so meri rakh se uthta nahin dhuan koi
khasara aur hi hota tha be-ghari ka magar
mujhe makan mein rakhta hai be-makan koi
kisi se hone na hone ke darmiyan ho jo rabt
wahin to rabt mein aata hai darmiyan koi
suragh de ke mujhe meri be-zabani ka
mujhi mein aan basa mujh sa be-zaban koi
tu mere aks ko mizan-e-aina mein na tol
utha raha hai abhi meri kirchiyan koi
tere khayal ki aabaadiyan chhupati hun
ki mujh se chhin na le meri bastiyan koi

koi tara na dikha sham ki virani mein

By

koi tara na dikha sham ki virani mein
yaad aaega bahut be-sar-o-samani mein
dam-ba-khud rah gaya wo pursish-e-haalat ke baad
aaina ho gai main aalam-e-hairani mein
dil salamat rahe tufan se tasadum mein magar
hath se chhut gaya hath pareshani mein
sahl karti main takhatub mein mukarna tujh se
mushkilen aur thin is rah ki aasani mein
ab teri yaad jo aae bhi to yun aati hai
jaise kaghaz ki koi naw chale pani mein
aise aalam mein meri nind ka aaseb na puchh
khwab mange hain teri chashm ki nigarani mein
khinch rakhti hai mere mere panw ko dahliz talak
koi zanjir hai is ghar ki nigahbani mein

ehsas to mujhi pe kar rahi hai

By

ehsas to mujhi pe kar rahi hai
chhukar jo hawa guzar rahi hai
jis ne mujhe shakh par na chaha
khushbu meri us ke ghar rahi hai
be-samti-e-ashk ki nadamat
is bar bhi ham-safar rahi hai
thahra hai wo jab se rahguzar mein
mitti meri raqs kar rahi hai
chupke se ghadi ghadi musafirat ki
dahliz pe panw dhar rahi hai
tare bhi nazar na aaen ghar mein
aankh aisi ghadi se dar rahi hai
tuta hua aks le ke ladki
aaine mein phir sanwar rahi hai

charagh-e-sham hi tanha nahin hai

By

charagh-e-sham hi tanha nahin hai
hawa main ne bhi ghar dekha nahin hai
wo baadal hai magar is dasht-e-jaan par
abhi dil khol kar barsa nahin hai
mohabbat ek hisar-e-be-nishan hai
lahu mein daera banta nahin hai
bikharti ja rahi hun aur khush hun
simatne mein koi sachcha nahin hai
khosha ai ru-e-shakh-e-sabz tujh par
sarab-e-aina khulta nahin hai
tujhe dekha hai jab se sham-aluda
meri aankhon mein din utra nahin hai
main kyun dekhun hujum-e-mahr-o-mah ko
meri tanhaiyon mein kya nahin hai
nahin jate hain dukh ab aa ke ghar se
ki ye aana tera aana nahin hai
bhatak jaengi raaten jis ke hathon
abhi us khwab ka charcha nahin hai
zaban gum thi asar ke zaiqon mein
tera mujrim lab-e-goya nahin hai