zahrili taKHliq

By

ek pal mein khatm ho sakti hai wusat dahr ki
chotiyon se chotiyon tak rasta
aage khala
aur khala ki tirgi mein dur se aai hui kirnon ke rangon ki numud
aasman ke panw par mahtab o anjum ke sujud
aur zamin ki raunaqon ka wahm fikr-e-raft-o-ud
bun diye kis ne ye tar-o-pud
kis ke hath mein aaya nizam-e-kaenat
kis ke zarre ban gae duniya sitare aaftab
kis ne aawara-khayali ko pilai fikr-e-shirin ki sharab
kis ne ye sab kuchh banaya
aur khud tarik pardon mein kahin baitha raha
kya ye sab phailaw mere waste hain
ya main khud us ki purani ruh mein baitha hua
gin raha hun us ke ashkon ki qatar
ponchhta hun us ke aansu mangta hun us se bhik
(chahta hun ruh ki khatir sukun)
wo to khud is khair-o-shar ke jal mein uljha hua
dard se betab takhliq-e-aziyyat se nidhaal
chikh kar kahta hai mujh ko mar dal

yaadon ki zanjiren

By

apne aap se ladte ladte ek zamana bit gaya
ab main apne jism ke bikhre tukdon ke ambar pe baitha
soch raha hun
mera in se kya rishta hai
in ka aapas mein kya rishta hai
kaun hun main
aur kis talwar se main ne apne jism ke tukde kate hain
ab main kya hun
aur ab mujh ko kya karna hai
main ne kya tamir kiya tha
chhoti chhoti yaadon ki zanjir se
main ne apne ang ang ko bandh liya tha
apne gird purane aur nae lafzon ki diwaren chun li thin
ab mera in diwaron se
in zanjiron se
koi rishta baqi hai to itna hai
jaise apni rihai ka mujh ko yaqin na ho
main diwana hun
ab mujh se itna faiz karo yaro
main ne jitne sher likhe hain mere sar pe de maro

sota jagta saya

By

tu chali ja ki mujhe teri zarurat bhi nahin
main shab-o-roz ki mitti se dobara bhi janam le lunga
main jo zindon mein hun zindon mein nahin
main parindon mein darindon mein nahin
faqat insanon mein maujud hai saya mera
muddaten bit gai hain magar anjam na aaya mera
main sipahi to nahin phir bhi ladi hain kai jangen main ne
pahli hi jang thi wo jis mein kate hath mere
dusri jang mein bazu bhi gae
tisri jang mein phuti meri donon aankhen
aur phir jang pe jang
ab mere jism ka hissa nahin aisa koi
jis mein zakhmon ke nishan raat se kam gahre hon
aakhiri zakhm lagaya tu ne
tu ne khamoshi ki shamshir se mara mujh ko
ab janam lena hai duniya mein dobara mujh ko
phir nae hath nae bazu nai aankh lagani hai mujhe
phir masihai dikhani hai mujhe
phir nai jang ki karni hai mujhe tayyari
aankh ko phodna hai dhundni hai bedari
tu mujhe mar ke khush thi ki main mar jaunga
sukhi mitti ki tarah khud hi bikhar jaunga
magar ai meri aziyyat ki amin
main tere khun mein maujud rahunga har waqt
surkh zarron ki tarah jin mein hawa hoti hai
zinda rahne ki ada hoti hai
tu mujhe kaun si talwar se kategi bata
ab safar mera teri chalti hui sans ke andar hoga

ruh ki aag

By

raat tak jism ko uryan rakhna
chand nikla to ye sahra ki sulagti hui ret
sard ho jaegi barsat ki shamon ki tarah
barf ho jaega jism
phir khunuk-tab hawa aaegi
teri peshani ko chhu jaegi
aur pasine ki ye nannhi bunden
ho ke tahlil fazaon mein bikhar jaengi
ret ke tilon se takraengi
ret ke tile hawaon ki nami chatenge
ret ke tilon ki tishna-dahani
aur bhadak utthegi
jab hawa dasht se aage nikli
patte patte ko jhulas jaegi
par jahan tu hai wahan
sard ho jaega zarra zarra
barf ho jaega jism
magar ek ruh ki aag
jis ko barsat ki shamon ne hawa di barson
chand ki zard shuaon se bhadak utthegi

main aur tu

By

main wo jhuta hun
ki apni shaeri mein aansuon ka zikr karta hun
magar rota nahin
aasman tute
zamin kanpe
khudai mar mite
mujh ko dukh hota hai
main wo patthar hun ki jis mein koi chingari nahin
wo payambar hun ki jis ke dil mein bedari nahin
tum mujhe itni haqarat se na dekho
ain-mumkin hai ki tum mera hayula dekh kar
ghaur se pahchan kar
apni aankhen phod lo
aur main khali nigahon se tumhein takta rahun
aagahi mujh ko piyari thi
magar is ka maal
zindagi bhar ka wabaal
ab liye phirta hun apne zehn mein sadiyon ka bojh
kuchh izafa is mein tum kar do
ki shayad koi talkhi aisi baqi rah gai ho
jis ko main ne aaj tak chakkha nahin

jine marne ke darmiyan ek saat

By

kabhi jine kabhi marne ki khwahish rok leti hai
wagarna main hawa ki lahr mein tahlil ho jaun
kidhar jaun ki har-su saaten raste ka patthar hain
agar baitha rahun to rakh mein tabdil ho jaun
wo jadugar tha jis ne raat par pahre bithae the
wagarna ab talak ye chand tare mit chuke hote
junun-e-agahi manus aankhon se chhalak jata
bisat-e-zindagi ke sare mohre pit chuke hote
mujhe malum hai ek chand din ko bhi nikalta hai
mujhe malum hai raaten bhi ek khurshid rakhti hain
agar ye donon aalam ek ho jaen to phir kya ho
hawaen raat din yaktai ki ummid rakhti hain
magar in wusaton ko kaun banhon mein sametega
kahan se aaegi wo raushni jo muntahi hogi
dilon ki tirgi kuchh aur gahri hoti jati hai
aziyyat raushni ki din ki rag rag ne sahi hogi
kidhar jaun ki har su raste kirnon ki surat hain
magar kirnon pe chalna be-qarari ko nahin aata
wo nuqta jis pe main hun marqad-e-sham-e-ghariban hai
magar is samt koi aah-o-zari ko nahin aata