der ho jaegi phir kis ko sunai doge

By

der ho jaegi phir kis ko sunai doge
dasht khud bol uthega to duhai doge
ab to is parda-e-aflak se bahar aa jao
hum bhi ho jaenge munkir to dikhai doge?
ab asiran-e-qafas jaise qafas mein bhi nahin
ab kahan hogi rihai jo rihai doge
shamen raushan hain to kya aalam-e-be-chehragi mein
tum koi bhi ho magar kis ko sujhai doge
hum to izhaar ke qael the hamesha ki tarah
kab tawaqqo thi ki nale ko rasai doge
kya khabar thi meri mehnat ke sile mein tum bhi
mere hathon mein ye kashkol-e-gadai doge
hum to is wasl-e-mukarrar pe bhi khush the 'shahzad'
jab ye malum tha ek aur judai doge

dekh in aankhon se kya jal-thal kar rakkha hai

By

dekh in aankhon se kya jal-thal kar rakkha hai
gham si aag ko hum ne baadal kar rakkha hai
jis ne rah ke pedon ki sab shakhen katin
sab ne usi ke sar par aanchal kar rakkha hai
koi pahad hai apni zat ke andar jis ne
khud hum se bhi hum ko ojhal kar rakkha hai
patthar le kar sara shahr hai us ke pichhe
ek pagal ne sab ko pagal kar rakkha hai
us ne khali dasht basane ki koshish mein
bhare-pure shahron ko jangal kar rakkha hai
teri hasti ek furaat sahi par tu ne
mere to aangan ko karbal kar rakkha hai
tere jalal ke munkir to chand ek hain lekin
tere azab ne sab ko be-kal kar rakkha hai
ab 'shahzad' zamane se kya lena-dena
hum ne bab-e-dard mukammal kar rakkha hai

apne roz o shab ka aalam karbala se kam nahin

By

apne roz o shab ka aalam karbala se kam nahin
arsa-e-matam hai lekin fursat-e-matam nahin
sirf jazb-e-shauq mein pauren lahu karte rahe
hum wahan uljhe jahan par koi pech o kham nahin
koi rog aisa nahin jo qarya-e-jaan mein na ho
koi sog aisa nahin jis mein ki shamil hum nahin
koi lai aisi nahin jo sarf-e-hangama nahin
ek bhi sur zindagi ke saz ka maddham nahin
ek sawan hi nahin hai khun rulane ke liye
apni aankhen khushk hone ka koi mausam nahin
dast-e-isa kya kare jab jism par rakhte hain hum
ek aisa zakhm jis ka waqt bhi marham nahin
aisi tanhai se to 'shahzad' mar jaana bhala
ek bhi dushman nahin aur ek bhi hamdam nahin