samajh sako to ye tishna-labi samundar hai

By

samajh sako to ye tishna-labi samundar hai
ba-qadr-e-zarf har ek aadmi samundar hai
ubhar ke dub gai kashti-e-khayal kahin
ye chand ek bhanwar chandni samundar hai
jo dastan na bane dard-e-bekaran hai wahi
jo aankh hi mein rahe wo nami samundar hai
na sochiye to bahut mukhtasar hai sail-e-hayat
jo sochiye to yahi zindagi samundar hai
tu is mein dub ke shayad ubhar sake na kabhi
mere habib meri khamushi samundar hai

sahil tamam ashk-e-nadamat se aT gaya

By

sahil tamam ashk-e-nadamat se at gaya
dariya se koi shakhs to pyasa palat gaya
lagta tha be-karan mujhe sahra mein aasman
pahuncha jo bastiyon mein to khanon mein bat gaya
ya itna sakht-jaan ki talwar be-asar
ya itna narm-dil ki rag-e-gul se kat gaya
banhon mein aa saka na haweli ka ek sutun
putli mein meri aankh ki sahra simat gaya
ab kaun jae ku-e-malamat ko chhod kar
qadmon se aa ke apna hi saya lipat gaya
gumbad ka kya qusur use kyun kaho bura
aaya jidhar se tair udhar hi palat gaya
rakhta hai khud se kaun harifana kashmakash
main tha ki raat apne muqabil hi dat gaya
jis ki aman mein hun wahi ukta gaya na ho
bunden ye kyun barasti hain baadal to chhat gaya
wo lamha-e-shuur jise jaankani kahen
chehre se zindagi ke naqaben ulat gaya
thokar se mera panw to zakhmi hua zarur
raste mein jo khada tha wo kohsar hat gaya
ek hashr sa bapa tha mere dil mein ai 'shakeb'
kholin jo khidkiyan to zara shor ghat gaya

raushan hain dil ke dagh na aankhon ke shab-charagh

By

raushan hain dil ke dagh na aankhon ke shab-charagh
kyun sham hi se bujh gae mahfil ke sab charagh
wo din nahin kiran se kiran mein lage jo aag
wo shab kahan charagh se jalte the jab charagh
tera hai khak-dan to falak be-nujum hai
lae kahan se mang ke dast-e-talab charagh
raushan-zamir aaj bhi zulmat-nasib hain
tum ne diye hain puchh ke nam-o-nasab charagh
wo tirgi hai dasht-e-wafa mein ki al-aman
chamke jo mauj-e-reg to pae laqab charagh
din ho agar to raat se tabir kyun karen
suraj ko ahl-e-hosh dikhate hain kab charagh
ai baad-e-tund waza ke paband hum bhi hain
patthar ki ot le ke jalaenge ab charagh

miThe chashmon se KHunuk chhanw se dur

By

mithe chashmon se khunuk chhanw se dur
zakhm khulte hain tere ganw se dur
sang-e-manzil ne lahu ugla hai
dur hum baadiya-paimaon se dur
kitni shamen hain asir-e-fanus
kitne yusuf hain zulekhaon se dur
kisht-e-ummid sulagti hi rahi
abr barsa bhi to sahraon se dur
jaur-e-haalat bhala ho tera
chain milta hai shanasaon se dur
jannat-e-fikr bulati hai chalo
dair-o-kaba se kalisaon se dur
raqs-e-ashufta-saran dekhenge
dur in anjuman-araon se dur
justuju hai dur-e-yakta ki 'shakeb'
sipiyan chunte hain dariyaon se dur

mere KHulus ki shiddat se koi Dar bhi gaya

By

mere khulus ki shiddat se koi dar bhi gaya
wo pas aa to raha tha magar thahar bhi gaya
ye dekhna tha bachane bhi koi aata hai
agar main dub raha tha to khud ubhar bhi gaya
ai raste ke darkhto samet lo saya
tumhaare jal se bach kar koi guzar bhi gaya
kisi tarah se tumhaari jabin chamak to gai
ye aur baat siyahi mein hath bhar bhi gaya
usi pahad ne phunke the kya kai jangal
jo khak ho ke mere hath par bikhar bhi gaya
yahin kahin mere honton ke pas phirta hai
wo ek lafz ki jo zehn se utar bhi gaya
wo shakh jhul gai jis pe panw qaem the
'shakeb' warna mera hath ta-samar bhi gaya

kya chiz hai ye sai-e-paiham kya jazba-e-kaamil hota hai

By

kya chiz hai ye sai-e-paiham kya jazba-e-kaamil hota hai
allah ko agar manzur na ho har maqsad baatil hota hai
ek tis si paiham pata hun kya is ko mohabbat kahte hain
mahsus mujhe mitha mitha kuchh dard sa ai dil hota hai
taskin ko dhoka dete hain nakaam tamanna ye kah kar
har-gam pe manzil hoti hai har mauj mein sahil hota hai
ye ranj-o-alam hi mere liye ab zist ka unwan hain hamdam
is duniya mein pahle pahle har kaam hi mushkil hota hai
taskin si kyun mil jati hai mizrab-e-dast-e-shauq mujhe
har tar-e-gareban kya wahshat ke saz ka hamil hota hai