naghma-e-ishq sunata hun main is shan ke sath

naghma-e-ishq sunata hun main is shan ke sath
raqs karta hai zamana mere wijdan ke sath
hai mera zauq-e-junun kufr-o-khirad ki zad mein
ai khuda ab to utha le mujhe iman ke sath
dil bana dost to kya kya na sitam us ne kiye
hum bhi nadan the nibhate rahe nadan ke sath
dagh mathe pe chale shaikh-o-barahman le kar
aae the dair-o-haram tak bade arman ke sath
gham-e-jaanan gham-e-hasti gham-e-haalat 'shakil'
kya kahun kitni balaen hain meri jaan ke sath

aaKHiri waqt hai aaKHiri sans hai zindagi ki hai sham aaKHiri aaKHiri

aakhiri waqt hai aakhiri sans hai zindagi ki hai sham aakhiri aakhiri
sang-dil aa bhi ja ab khuda ke liye lab pe hai tera nam aakhiri aakhiri
kuchh to aasan hoga adam ka safar un se kahna tumhein dhundhti hai nazar
nama-bar tu khudara na ab der kar de de un ko payam aakhiri aakhiri
tauba karta hun kal se piyunga nahin mai-kashi ke sahaare jiyunga nahin
meri tauba se pahle magar saqiya sirf de ek jam aakhiri aakhiri
mujh ko yaron ne nahla ke kafna diya do ghadi bhi na biti ki dafna diya
kaun karta hai gham tutte hi ye dam kar diya intizam aakhiri aakhiri
jite-ji qadr meri kisi ne na ki zindagi bhi meri bewafa ho gai
duniya walo mubarak ye duniya tumhein kar chale hum salam aakhiri aakhiri

hangama-e-gham se tang aa kar izhaar-e-masarrat kar baiThe

hangama-e-gham se tang aa kar izhaar-e-masarrat kar baithe
mashhur thi apni zinda-dili danista shararat kar baithe
koshish to bahut ki hum ne magar paya na gham-e-hasti se mafar
virani-e-dil jab had se badhi ghabra ke mohabbat kar baithe
hasti ke talatum mein pinhan the aish o tarab ke dhaare bhi
afsos hami se bhul hui ashkon pe qanaat kar baithe
zindan-e-jahan se ye nafrat ai hazrat-e-waiz kya kahna
allah ke aage bas na chala bandon se baghawat kar baithe
gulchin ne to koshish kar dali suni ho chaman ki har dali
kanton ne mubarak kaam kiya phulon ki hifazat kar baithe
har chiz nahin hai markaz par ek zarra idhar ek zarra udhar
nafrat se na dekho dushman ko shayad wo mohabbat kar baithe
allah to sab ki sunta hai jurat hai 'shakil' apni apni
'haali' ne zaban se uf bhi na ki 'iqbaal' shikayat kar baithe

ye tamam ghuncha-o-gul main hansun to muskuraen

ye tamam ghuncha-o-gul main hansun to muskuraen
kabhi yak-ba-yak jo ro dun to sitare tut jaen
mere dagh-e-dil ki tabish jo kabhi ye dekh paen
wahin rashk-e-be-aman se mah-o-mehr dub jaen
kabhi zauq-e-justuju par agar eatibar kar lun
sar-e-rah manzilen khud mujhe dhundne ko aaen
kabhi be-qarar ho kar jo main saz-e-ishq chhedun
to ye mushtari-o-zohra koi git phir na gaen
mera zauq mai-parasti hai kuchh is qadar mukammal
jo main jam-e-mai utha lun to baras paden ghataen
sar-e-mai-kada jo dekhen meri mai-kashi ka manzar
hon shuyukh sar-ba-sajda kare zahid iltijaen

ye kya sitam-zarifi-e-fitrat hai aaj-kal

ye kya sitam-zarifi-e-fitrat hai aaj-kal
begangi sharik-e-mohabbat hai aaj-kal
gham hai ki ek talkh haqiqat hai aaj-kal
dil hai ki sogwar-e-mohabbat hai aaj-kal
tanhai-e-firaq se ghabra raha hun main
mere liye sukun bhi qayamat hai aaj-kal
har sans tarjuman-e-gham-e-dil hai in dinon
har aah parda-dar-e-hikayat hai aaj-kal
meri wafa hi mere liye qahr ban gai
apni wafa pe un ko nadamat hai aaj-kal
phir chahta hun ek alam taza-tar 'shakil'
phir dil ko justaju-e-masarrat hai aaj-kal

ye duniya hai yahan dil ko lagana kis ko aata hai

ye duniya hai yahan dil ko lagana kis ko aata hai
hazaron pyar karte hain nibhana kis ko aata hai
ye duniya hai yahan dil mein samana kis ko aata hai
mitane wale lakhon hain banana kis ko aata hai
nigahen pher lin tum ne to hum kis ki taraf dekhen
tumhi kah do mohabbat ka fasana kis ko aata hai
wafa ka yun to dam bharte hain is duniya mein sab lekin
wafa ke nam par mit kar dikhana kis ko aata hai