chup guzar jata hun hairan bhi ho jata hun

By

chup guzar jata hun hairan bhi ho jata hun
aur kisi din to pareshan bhi ho jata hun
sidha rasta hun magar mujh se guzarna mushkil
gumrahon ke liye aasan bhi ho jata hun
faeda mujh ko sharafat ka bhi mil jata hai
par kabhi bais-e-nuqsan bhi ho jata hun
apne hi zikr ko sunta hun harifon ki tarah
apne hi nam se anjaan bhi ho jata hun
raunaqen shahr basa leti hain mujh mein apna
aan ki aan mein sunsan bhi ho jata hun
zindagi hai to badal leti hai karwat 'shahpar'
aadmi hun kabhi haiwan bhi ho jata hun

hanste hue huruf mein jis ko ada karun

By

hanste hue huruf mein jis ko ada karun
bachchon se kis jahan ki kahani kaha karun
ya rab azab-e-harf-o-takhaiyyul se de najat
ghazlen kaha karun na mazamin likha karun
qadmon mein kis ke dal dun ye nam ye nasab
kuchh to batao kis ka qasida padha karun
ab tak to apne aap se pichha na chhut saka
mumkin hai kal se aap ke haq mein dua karun
kitni nai zaban ho kaisa naya sukhan
is ahd ko to dekh lun 'ghaalib' ko kya karun
'shahpar' meri hadon ka tayyun kare koi
aankhon se bah rahun ki ragon mein phira karun

be-intiha hona hai to is KHak ke ho jao

By

be-intiha hona hai to is khak ke ho jao
imkan ki masafat karo aflak ke ho jao
sab qisson ko chhodo dil-e-sad-chaak ke ho jao
is daur-e-junun-khez mein idrak ke ho jao
khushiyon se kahan rabt hai hum ko bhi tumhein bhi
aa jao isi lamha-e-namnak ke ho jao
is bagh mein shamshir-e-hawa se na bachoge
khush rang ho jao kisi poshak ke ho jao
be-zaeqa hone se yahi zaiqa achchha
ashjar se utro khas-o-khashak ke ho jao
sar-poshi ka fan hathon ko sikhlao wagarna
be-ankh ke be-kan ke be-nak ke ho jao
'shahpar' ki tarah khak se udte hi phiroge
banna hai to bas jao kisi chaak ke ho jao

hum zindagi-shanas the sab se juda rahe

By

hum zindagi-shanas the sab se juda rahe
basti mein haul aaya to jangal mein ja rahe
kamre mein mere dhup ka aana ba-waqt-e-subh
aankhon mein kash ek hi manzar basa rahe
phir aaj mere dard ne mujh ko mana liya
koi kisi aziz se kab tak khafa rahe
kab tak kisi padaw pe wahshat kare qayam
kab tak kisi ke hijr ka saya ghana rahe
baba ye mujh haqir ko itni badi dua
tu baat ka dhani hai tera qad siwa rahe
'shahpar' sada-e-waqt se kar lo musalahat
mahrumiyon ke dar pe koi kyun pada rahe