hamare panw Darte hain tumhaare sath chalne mein

hamare panw darte hain tumhaare sath chalne mein
zara sa waqt lagta hai kabhi niyyat badalne mein
tumhein shayad pata ho ya na ho shayad pata tum ko
ki salon-sal lagte hain chubha kanta nikalne mein
kisi patthar ki murat se na karna pyar tum hargiz
hazaron sal lagte hain buton ka dil pighalne mein
zara sa waqt to de zindagi mujh ko sambhalne ka
bura ho waqt to kuchh waqt lagta hai sambhalne mein
na jaane kyun bujhi aankhon mein jugnun se chamakte hain
abhi to waqt baqi hai andheri raat dhalne mein

dagh jo ab tak ayan hain wo bata kaise miTen

dagh jo ab tak ayan hain wo bata kaise miten
fasle jo darmiyan hain wo bata kaise miten
ek muddat se dilon mein dard ki hain bastiyan
dard ki jo bastiyan hain wo bata kaise miten
raat bhar soya nahin main bas isi ek fikr mein
an-suni kuchh siskiyan hain wo bata kaise miten
kis tarah rishton mein aai talkhiyan ye phir kaji
be-sabab jo talkhiyan hain wo bata kaise miten
shama kal jalti rahi hai der tak is soch mein
kuchh andhere be-zaban hain wo bata kaise miten
jo purane the gunah wo dho diye tu ne magar
khun ke taza nishan hain wo bata kaise miten
main ghamon ke baadalon ki baat ab karta nahin
khauf ke jo aasman hain wo bata kaise miten

bech di kyun zindagi do-chaar aane ke liye

bech di kyun zindagi do-chaar aane ke liye
ek do lamha to rakhta muskurane ke liye
daud kar daftar gae bhage wahan se ghar gae
lunch mein fursat nahin hai lunch khane ke liye
kis liye kis ke liye tattu bane ho raat din
aaj bhi roya hai bachcha god aane ke liye
ganw mein man-bap tum ko yaad karte hain bahut
waqt thoda sa nikalo ganw jaane ke liye
kuchh samay ghar ke liye bhi ab nikalo dosto
din bahut thode bache hain ghar bachane ke liye