jaane kya baat hai manus bahut lagta hai

By

jaane kya baat hai manus bahut lagta hai
ye jo ek ghair sa is bazm mein aa baitha hai
umr-bhar tu ne zamane ka kaha mana hai
dil ki aawaz bhi sun dekh to kya kahta hai
mil bhi jae jo koi naw to ab kya hasil
ab to dariya mere darwaze pe aa pahuncha hai
us ne dil jaan ke chheda use malum na tha
mere pahlu mein dahakta hua angara hai
mera ji jaane hai ya mera khuda jaane hai
kya suna hai tere is shahr mein kya dekha hai
hae kya dida-wari hai ki sahar-dam ye khula
jis ko hum shama samajhte rahe parwana hai
koi roe to hanso koi hanse to rowo
aaj ke daur mein jine ka yahi rasta hai
mere sine mein khunuk tirgiyan chhod gaya
ek aaina ki suraj ki tarah jalta hai
koi basti na koi ped na chashma koi
qafila umr-e-rawan ka ye kahan utra hai
jah-o-mansab ki hawas ho to main kafir 'shohrat'
main sag-e-ku-e-ali hun mera kya kahna hai

hum shahr mein ek shama ki KHatir hue barbaad

By

hum shahr mein ek shama ki khatir hue barbaad
logon ne kiya chand ke sahraon ko aabaad
har samt falak-bos pahadon ki qataren
'khusraw' hai na 'shirin' hai na tesha hai na farhad
barson se yahi khwab hain nindon ki sajawat
gulshan hai magar gul hai na bulbul hai na sayyaad
hun tair-e-be-baam charagh-e-sar-e-sahra
ummid-e-karam hai na mujhe shikwa-e-bedad
jis ghar ko basaya tha meri be-khabari ne
aaj us ko teri khud-nigari kar gai barbaad
kuchh aisa dhuan hai ki ghutti jati hain sansen
is raat ke baad aaoge shayad na kabhi yaad
har zarra hai madfan meri hairat-nigahi ka
yarab! ye gali kuche hamesha rahen aabaad
kal apni bhi taswir na pahchan sakenge
is daur ko bakhshe gae wo 'mani' wo 'bahzad'
sunsan hai zindan bhi bisan-e-dil-e-shaer
ne shor-e-salasil hai na hangama-e-fariyaad
khurshid-e-qayamat utar aae rag-e-jaan mein
ai naghmagaro aisi koi tarz ho ijad
'shohrat' ki hai ab wajh-e-pareshani-e-ahbab
uth jaega jis roz tu aaega bahut yaad

aa dil mein tujhe kahin chhupa lun

By

aa dil mein tujhe kahin chhupa lun
logon ki nigah se bacha lun
kyun tujh pe guman-e-be-wafai
kyun apne hi dil ki bad-dua lun
diwar-e-umid gir rahi hai
taswir teri kahan laga lun
aaine ki dhund saf kar ke
kyun khud ko na haal-e-dil suna lun
ye fasle kaise khatm honge
main kaise tujhe yahan bula lun
katte hi nahin pahad se din
'shohrat' main use kahan se pa lun

dil ne kis manzil-e-be-nam mein chhoDa tha mujhe

By

dil ne kis manzil-e-be-nam mein chhoda tha mujhe
raat bhar khud mere sae ne bhi dhunda tha mujhe
mujh ko hasrat ki haqiqat mein na dekha us ko
us ko naraazgi kyun khwab mein dekha tha mujhe
ajnabi ban ke sar-e-rah mila tha jo abhi
ye wahi shakhs hai jis ne kabhi chaha tha mujhe
jab bhi tanhai mile aaina hai ya main hun
us ne kis aan se kis aan mein dekha tha mujhe
jin se bhaga tha wahi suraten phir samne hain
kaun si qabr mein duniya ne utara tha mujhe
wo faqat mere liye paida hue hain 'shohrat'
kaun sa lamha tha jab wahm ye guzra tha mujhe