zalzala aaya makan girne laga

By

zalzala aaya makan girne laga
nind mein ek khwab-dan girne laga
bap ki rukhsat ka lamha hae hae
ek ghanera saeban girne laga
wo zamin ki aur badhta hi raha
aasman par aasman girne laga
haala-e-taq-e-talab mein dafatan
ek charagh-e-khush-guman girne laga

udasi ke daldal mein girta hua dil

By

udasi ke daldal mein girta hua dil
bachaun main kaise ye marta hua dil
main us ki mohabbat mein labrez dariya
wo mujh mein utar ke ubharta hua dil
sitare khala se abhi tod laun
magar aasman se ye darta hua dil
kabhi tum ne dekha hai bolo batao
kisi aaine mein sanwarta hua dil
ayan us ki aankhon ki shaffafiyat mein
dhule paniyon sa nikharta hua dil
atakta sambhalta sambhal ke thaharta
kathin raston se guzarta hua dil
jatan lakh kar lo na aaega qabu
hai ek mauj-e-sarkash bipharta hua dil

tumhaare nam kar baiThe dil-o-jaan ki KHushi sahab

By

tumhaare nam kar baithe dil-o-jaan ki khushi sahab
hasin-o-dil-nasin lagti hai ab to zindagi sahab
milan ki saaton mein jaan-fiza khushbu anokhi hai
hama-dam raqs karti hai ajab ek be-khudi sahab
tar-o-taza hui mitti meri bas ek lamhe mein
hunar ab aazmao aur karo kuza-gari sahab
tumhaare ek harf-e-khush-numa par war dun ghazlen
sukhan ki jaan ho tum aur qalam ki raushni sahab
sitare git gate hain samundar raqs karta hai
mukammal ho gae hum tum nahin koi kami sahab
yahi sach hai ki hum tum mukhtalif hain aur logon se
zamane mein misali hai hamari ham-rahi sahab
ki jab bhi hath mere bargah-e-rab mein uthte hain
tashakkur lab pe hota hai nigahon mein nami sahab

safar guman hai rasta KHayal hai

By

safar guman hai rasta khayal hai
chaloge mere sath kya khayal hai
agar jahan-e-khush-numa fareb hai
to sab fareb hai khuda khayal hai
nazar ko aks jaan ki lalak hai aur
ghazab ye hai ki aaina khayal hai
kisi nazar ki raushni se munsalik
ye taq mein dhara diya khayal hai
kabhi yahan wahan bhatak ke rah gaya
kabhi khayal se mila khayal hai
mujhe bhi ab nahin hai is ki aarzu
use bhi ab kahan mera khayal hai
dhuan hawa mein ud gaya 'shumaila'
sukhan tera bujha hua khayal hai