ye aankh tanz na ho zaKHm-e-dil hara na lage

ye aankh tanz na ho zakhm-e-dil hara na lage
mujhe qarar to ho ya use haya na lage
fishaar-e-jaan ho to kaifiyat-e-mukammal ho
wo iztirab to ho iztirab sa na lage
wo ru-ba-ru ho to aaraish-e-bayan bhi na ho
ki main kahun to kisi aur ka kaha na lage
muamalat-e-mohabbat mizaj rakhte hain
tabiaten hon jo yaksan to fasla na lage
khizan-rasida chaman mein bhi jhulti ho bahaar
gulon se rang kali se mahak juda na lage
yahi to hoti hai waz-e-shaguftan-e-mahtab
miyan-e-abr ho ya aasman khula na lage
wahi to dard hai jo dard-e-ma-siwa samjhe
rifaqaten hon to aalam nigar-khana lage
alam to khair alam hai ki paedar nahin
wabaal hai jo khushi bhi gurez-pa na lage
ulajh rahi hain khayali udan se aankhen
kahin nawishta-e-diwar be-sada na lage

shauq-e-warafta ko malhuz-e-adab bhi hoga

shauq-e-warafta ko malhuz-e-adab bhi hoga
shart hai mal-e-arab pesh-e-arab bhi hoga
lab-o-rukhsar mein hogi gul-o-mahtab ki baat
aankh mein tazkira-e-bint-e-inab bhi hoga
man leta hai meri baat mera hila-taraaz
aur sab wadon mein ek wada-e-shab bhi hoga
ishq wo shai hai ki barfile nihan-khanon mein
sard pad jae sharar-bar to jab bhi hoga
be-talluq hi sahi ye magar us shakhs ke pas
dil jo lagta hai to lagne ka sabab bhi hoga
har gali shahr ki ghaalicha-e-ushshaq nahin
khun-e-nahaq hai to phir dad-talab bhi hoga
qahr darwesh to hota hai ba-jaan-e-darwesh
zer-e-farman jo hota tha so ab bhi hoga
karb ke zahr ka mara hua insan hai ye
sar pe sau bojh magar khanda-ba-lab bhi hoga
ek asa pas na ho zoam-e-kalimi bhi ho
aisa lagta hai ki ye kar-e-ajab bhi hoga
yun to be-ab hain kheme ye jahan tak bhi hain
dil ye kahta hai kahin abr-e-tarab bhi hoga

na jaane jae kahan tak ye silsila dil ka

na jaane jae kahan tak ye silsila dil ka
wo mil bhi jae to milta nahin sila dil ka
baras rahi thin bahaaren taras rahi thi zamin
safar tamam hua phul kab khila dil ka
kahan hai wo shah-khubi kahan daricha-e-shab
gae wo din ki samaat mein tha gila dil ka
wahi kharabi-e-jaan ka sabab bhi hai lekin
qarar-e-jaan hai ki ye hai moamla dil ka
use fusun-gar o be-mehr main nahin kahta
firaq-e-yar ka bais hai fasla dil ka
talash usi ki musalsal usi ko pa kar bhi
zamin se ta-ba-falak hai ye mashghala dil ka
kisi tilism-e-hijabaat mein koi gum hai
bhatak raha hai khayalon mein qafila dil ka

jo Dar apnon se hai ghairon se wo Dar ho nahin sakta

jo dar apnon se hai ghairon se wo dar ho nahin sakta
ye wo khanjar hai jo sine se bahar ho nahin sakta
jo sach puchho to ye taswir bhi hai saneha jaisi
kisi bhi sanehe par koi shashdar ho nahin sakta
khatakti hai kisi shai ki kami is dar-e-fani mein
shikasta baam-o-dar jis ke na hon ghar ho nahin sakta
ye aakhir kyun ki har din ek mausam ek hi manzar
jahan zer-o-zabar ho us se behtar ho nahin sakta
na shamil ho jo aashufta-khayali zehn-e-mohkam mein
wo kuchh bhi ho chaman-zar-e-muattar ho nahin sakta
kali ka lab badan kundan ka qamat sarw ki lekin
wafa na-ashna mere barabar ho nahin sakta
faqat surat mein kya rakkha hai ai husn-e-tamasha hain
ki kar-e-aina se main sikandar ho nahin sakta
kisi ko chahne se baz aana kaise mumkin hai
likha hai jo kitabon mein wo aksar ho nahin sakta
tere inkar ko is zawiye se dekhta hun main
tera milna bhi mear-e-muqaddar ho nahin sakta
ye mana aib bhi hain saikdon kis mein nahin hote
'amin-ashraf' magar tujh sa qalandar ho nahin sakta

haal-e-dil-e-tabah kisi ne suna kahan

haal-e-dil-e-tabah kisi ne suna kahan
puchhe magar koi to lab-e-muddaa kahan
tai kar raha hun khwab-o-haqiqat ke fasle
mana ki main kahan teri aawaz-e-pa kahan
aalam tamam pairahan-e-tar-tar hai
mahshar sukut-e-nim-shabi ka utha kahan
wo dard justuju-e-gul-e-naghma thi jise
khud apne reg-zar mein gum ho gaya kahan
is darja be-rukhi pe pasheman na ho koi
khud mujh ko ehtiram-e-shuur-e-wafa kahan

daraKHshan ho jo wo mah-zada-e-shab

darakhshan ho jo wo mah-zada-e-shab
bikhar jae ghubar-e-jada-e-shab
na aai ek shab-e-aish-e-tarab-za
hua tha wo kabhi aamada-e-shab
koi lahra raha tha apne gesu
miyan-e-zikr-e-mauj-e-baada-e-shab
na tujh ko dekhte ek shab khiraman
na hote is qadar dildada-e-shab
kahan hai ai mere mah-e-jawan-sal
bulati hai nigar-e-sada-e-shab