zindagi ke giton ke bol sunna

By

samaat-e-munjamid ke malik
samaaton par jumud ho to
dinon ko hafton mein dhaalne ka nahin koi mashghala
ba-juz ye ki wadiyon mein sada ki duri pe bajne wale
suhane sapnon ke dhol sunna
rafu-gar-e-daman-e-tamanna
har ek dhadkan pe dil mein ek tis si na utthe
har ek harakat pe aablon mein mari hui sans ji na utthe
kisi ki aawaz-e-pa se dam todti hui zindagi na utthe
koi pukare koi na utthe
to jhil-ankhon kanwal se chehron ko bhulne ka
koi tariqa nahin
ba-juz ye ki sahilon par purane sipon ke khol chunna
rafu-gar-e-daman-e-tamanna
agar kabhi aablon ki sansen bahaal hon to
lahu se ruton ke jal bunna
samaat-e-munjamid ke malik
samaaton se jo barf sar ke
nadi ke giton ke bol sunna

jaan majbur hun

By

ek taraf tere lab
teri aankhon mein jalte charaghon ki lau
tere aariz pe kirnon ka badhta hujum
tera jhilmil badan teri rangin saba aur un ke siwa
sare rangon ki maut
sab sadaon ke sakte pe girya-kunan
bas teri ek sada
aur ek war aur zahr ka ek jam
dusri samt hain
raushni rang kirnen sadaen adaen badan hi badan
ek tere siwa
lakh rangin lab
aur aankhon mein jalte hazaron diye
kuchh taqaze bhi aur chand mahrumiyan
man mein gundhi hui chand majburiyan
ek taraf war aur zahr ka ek jam
dusri samt kirnen adaen badan hi badan
faisla saf hai
jaan majbur hun
main na suqraat hun
aur na mansur hun

ajab dorahe pe aa khada hun

By

ajab dorahe pe aa khada hun
idhar tere husn ki dhanak hai
udhar adu ki kamin-gahon mein aslahe ki chamak damak hai
udhar teri nuqrai hansi hai
idhar samaat-kharash chikhon ka zer-o-bam hai
udhar tere tarah jism
zindagi ki hararton ka naqib ban kar bula raha hai
idhar ajal nit zindagi ko
thapak thapak kar sula raha hai
ajab dorahe pe aa khada hun
main sochta hun
ki kaun sa saz-e-fan uthaun
qalam uthaun ki gun uthaun

surKH phande sunahri malaen

By

tere pahlu mein barf ka tukda
jaane pighlega kaun si rut mein
ab to pairahan-e-himala bhi
misl-e-daman-numa-e-qais hua
baal khulne lage hain shisham ke
budh ki surat jumud ki rut mein
be-niyaz-e-libas-e-takhmina
the gyani jo wo safede bhi
hain sar-e-rah mahw-e-bos-o-kanar
apni khush-qamati pe itraati
pahanne wali hain khajuren bhi
surkh phande sunahri malaen