patton ke sae

By

sham ke dhalte utarne ke liye koshan
hua karti hai jab jab makhmalin shab
bagh ke atraf phaile sab gharon ki batiyan
jalti hain ek ke baad ek ek
aise mein patton ke sae khidkiyon ke lambe shishon par
samete apna sara husn mujh ko dekh kar goya
khushi se muskuraate hain jahan-e-dil sajate hain

pardes ka shahr

By

ye surmai baadalon ke sae
ye sham ki taza taza si rut
ye gadiyon ki kai qataren
ye bagh mein sair karte jode
ye bachchon ke qahqahe surile
wo dur se kokti koyaliya
ye aks pani mein bijliyon ka
chahaar jaanib hai shadmani
magar main hun be-qarar muztar
nahin hai us shahr mein mera ghar

muntazir hai sham

By

do-jahan ka husn le kar muntazir hai sham khidki par
shikasta-pursi na-ummid ashk aankhon mein bhar kar
is tarah sakit na baitho ek jagah par
kanch ko patthar ki sangat mein hi rahna ho
to ek rasta ye hai
wo faslon ko darmiyan rakhe
suno
ye zist aisi shai nahin mil paegi phir
do-jahan ka husn le kar muntazir hai sham khidki par
chalo halke se rangon ki lapeto odhni
baramde mein us se khelengi hawaen kasni
phir jamuni si raushni odhaegi ek makhmalin chadar
muqayyash us mein sitare tankne utrenge
dekho
zindagi ka aur ek din hai guzarne ko utho to
do-jahan ka husn le kar muntazir hai sham khidki par

meditation

By

meditation
kuchh na sochun
main kuchh nahin sochun
yun hi khidki se sham ko dekhun
pur-sukun aasman khamosh darakht
surmai raushni hawa ye sakun
apni nas nas mein muntaqil kar lun
dil ki dhadkan ko rok dun kuchh pal
ek dafa palak nahin jhapkun
yun hi baithi rahun jo be-jumbish
ruh phir rab se baat karti hai
kitne hi kaam sath karti hai

hazar sher

By

sham tujh par hazar sher kahun
dil ko phir bhi qarar aata nahin
ye tera husn ye halimi teri
teri khamoshiyan ye mani-khez
din samete to apne aanchal mein
kaise pal pal bikher deti hai rang
aur andhere mein dub jaane ko
tera kuchh hi ghadi ka narm wajud
khushbuen gholta fazaon mein
dosh par yun ude hawaon ke
jaise tujh ko siwae ulfat ke
aur kuchh bhi nahin sujhai de
kis qadar pur-sukun lagte hain
aa ke teri panah mein ye shajar
sar-bulandi ye kohsaron ki
hui wazeh shafaq mein tere sabab
ho gae naghma-rez sab tair
jaane kab main bhi gungunane lagi