ek tariKH muqarrar pe to har mah mile

By

ek tarikh muqarrar pe to har mah mile
jaise daftar mein kisi shakhs ko tankhwah mile
rang ukhad jae to zahir ho plastar ki nami
qahqaha khod ke dekho to tumhein aah mile
jama the raat mere ghar tere thukrae hue
ek dargah pe sab randa-e-dargah mile
main to ek aam sipahi tha hifazat ke liye
shah-zadi ye tera haq tha tujhe shah mile
ek udasi ke jazire pe hun ashkon mein ghira
main nikal jaun agar khushk guzargah mile
ek mulaqat ke talne ki khabar aise lagi
jaise mazdur ko hadtal ki afwah mile
ghar pahunchne ki na jaldi na tamanna hai koi
jis ne milna ho mujhe aae sar-e-rah mile

daen bazu mein gaDa tir nahin khinch saka

By

daen bazu mein gada tir nahin khinch saka
is liye khol se shamshir nahin khinch saka
shor itna tha ki aawaz bhi dabbe mein rahi
bhid itni thi ki zanjir nahin khinch saka
har nazar se nazar-andaz-shuda manzar hun
wo madari hun jo rahgir nahin khinch saka
main ne mehnat se hatheli pe lakiren khinchin
wo jinhen katib-e-taqdir nahin khinch saka
main ne taswir-kashi kar ke jawan ki aulad
un ke bachpan ki tasawir nahin khinch saka
mujh pe ek hijr musallat hai hamesha ke liye
aisa jin hai ki koi pir nahin khinch saka
tum pe kya khak asar hoga mere sheron ka
tum ko to mir-taqi-'mir' nahin khinch saka

baDe tahammul se rafta rafta nikalna hai

By

bade tahammul se rafta rafta nikalna hai
bacha hai jo tujh mein mera hissa nikalna hai
ye ruh barson se dafn hai tum madad karoge
badan ke malbe se is ko zinda nikalna hai
nazar mein rakhna kahin koi gham-shanas gahak
mujhe sukhan bechna hai kharcha nikalna hai
nikal laya hun ek pinjre se ek parinda
ab is parinde ke dil se pinjra nikalna hai
ye tis barson se kuchh baras pichhe chal rahi hai
mujhe ghadi ka kharab purza nikalna hai
khayal hai khandan ko ittilaa de dun
jo kat gaya us shajar ka shajara nikalna hai
main ek kirdar se bada tang hun qalamkar
mujhe kahani mein dal ghussa nikalna hai