tum ho jo kuchh kahan chhupaoge

By

tum ho jo kuchh kahan chhupaoge
likhne walo nazar to aaoge
jab kisi ko qarib paoge
zaiqa apna bhul jaoge
aaina hairaton ka khwab nahin
khud se aage bhi khud ko paoge
ye hararat lahu mein kai din ki
khud-ba-khud us ko bhul jaoge
aandhiyan roz mujh se puchhti hain
ghar mein kis din diya jalaoge
saya roke hue hai rah safar
tum ye diwar kab giraoge
ab jo aae bhi tum to kya hoga
khud dikhoge mujhe dikhaoge
yahi hoga ki tum dar-e-jaan par
dastaken de ke laut jaoge
wo jo ek shakhs mujh mein zinda tha
us ko zinda kahan se laoge
aise mausam guzar gae hain ki ab
mujh ko bhi mujh sa tum na paoge
jo lahu mein diye jalati thin
aisi shamen kahan se laoge
khwahishon ke hisar mein ghir kar
rasta ghar ka bhul jaoge

naz kar naz ki ye naz juda hai sab se

By

naz kar naz ki ye naz juda hai sab se
mera lahja meri aawaz juda hai sab se
juz mohabbat kise malum ki wo chashm-e-haya
baat to karti hai andaz juda hai sab se
jis ko bhi mar diya zinda-e-jawed kiya
harf-e-haq tera ye eajaz juda hai sab se
dekhna kaun hai kya us ko nahin jaan-e-aziz
sar-e-darbar ek aawaz juda hai sab se
tut jata hai to sur aur bhi lau dete hain
dil jise kahte hain wo saz juda hai sab se
soch kar dam bichhana zara ai mauj-e-hawa
mere inkar ki parwaz juda hai sab se
nashsha-e-dahr-o-qayamat ka to kya zikr 'umid'
wo mera sarw-e-sar-afraaz juda hai sab se

kisi se aur to kya guftugu karen dil ki

By

kisi se aur to kya guftugu karen dil ki
ki raat sun na sake hum bhi dhadkanen dil ki
magar ye baat khirad ki samajh mein aa na saki
visal-o-hijr se aage hain manzilen dil ki
jilau mein khwab-numa rat-jage sajae hue
kahan kahan liye phirti hain wahshaten dil ki
nigah milte hi rang-e-haya ki surat hain
chhalak uthin tere rukh se latafaten dil ki
nigah-e-kam bhi use sang se ziyaada hai
ki aaine se siwa hain nazakaten dil ki
dayar-e-harf-o-nawa mein koi to aisa ho
kabhi kisi se to hum baat kar saken dil ki
sar-e-jarida-e-hasti hamare baad 'umid'
lahu se kaun likhega ibaraten dil ki

aaina-e-wahshat ko jila jis se mili hai

By

aaina-e-wahshat ko jila jis se mili hai
wo gard rah-e-tark-e-marasim se uthi hai
sadiyon ke tasalsul mein kahin gardish-e-dauran
pahle bhi kahin tujh se mulaqat hui hai
ai karb-o-bala khush ho nai nasl ne ab ke
khud apne lahu se teri tarikh likhi hai
us kaj-kulah-e-ishq ko ai mashq-e-sitam dekh
sar tan pe nahin phir bhi wahi sarw-qadi hai
kis rah se tujh tak ho rasai ki har ek samt
duniya kisi diwar ke manind khadi hai
zindan ki fasilen hon ki maqtal ki fazaen
raftar-e-junun bhi kahin roke se ruki hai
jis rup mein jab chahe jise dhaal de 'ummid'
duniya bhi ajab kar-gah-e-kuza-gari hai