zahr mein bujhti hui bel hai diwar ke sath

By

zahr mein bujhti hui bel hai diwar ke sath
jaise ek naika baithi ho gunahgar ke sath
mujh se milna hai to ye qaid nahin mujh ko pasand
har mulaqat muqayyad rahe itwar ke sath
ek hi war mein marne se kahin behtar hai
ek ek sar wo jo katta rahe talwar ke sath
main ne har-gam pe un logon ko marte dekha
wo jo jite rahe is daur mein kirdar ke sath
ye jahan muflis-o-nadar ka hamdard ho kyun
jis ke har kone pe tahrir hai zardar ke sath
koi shair mere marne ki khabar laya hai
ek sah-columni surkhi liye akhbar ke sath
jashn-e-khun-nab hai maqtal mein mughanni se kaho
koi ek rag naya git ho malhaar ke sath
main bhi is shahr-e-khamoshan ka hi sakin hun 'umid'
jis ki har lauh pe tahrir hai aazar ke sath

tham zara waqt-e-ajal didar-e-jaan hone laga

By

tham zara waqt-e-ajal didar-e-jaan hone laga
aakhiri hichki pe koi mehrban hone laga
kis sitamgar ne uda li yaad-e-mazi ki bayaz
har gali har mod par qissa bayan hone laga
jaane kis gul ne chaman ki hurmaten pamal kin
mausam-e-fasl-e-bahaaran bhi khizan hone laga
dafn kar ke qabr mein jab ja chuke ahbab dost
jo kabhi socha na tha wo imtihan hone laga
dast-o-pa shal ho gae hain quwwaten zail huin
zindagani ka safar aage rawan hone laga
khwahishon ki chah mein khusran ke saude kiye
manfat samjha jise aakhir ziyan hone laga
koi wada aaj tak ifa nahin tum ne kiya
baat sachchi thi magar wo bad-guman hone laga
panw ki aahat ne mujh ko gor mein chaunka diya
hichkiyon ka saz dil ka tarjuman hone laga
kaisi khush-fahmi tumhein kis baat ka gharra 'umid'
aa gae hain aqraba waqt-e-azan hone laga

ruThna chaho to ab hargiz manane ka nahin

By

ruthna chaho to ab hargiz manane ka nahin
dil ko mail kar liya aansu bahane ka nahin
raste dhundla gae hain raushni walo suno
wada jalne ka kiya tha timtimane ka nahin
kashtiyan manjdhaar mein hain nakhuda naraaz hain
aasmanon se kaho bijli girane ka nahin
kab dhalegi sham-e-gham kab khatm hoga zulm-o-jabr
zindagi insan ki hai unwan fasane ka nahin
lo chale jate hain khali hath duniya se 'umid'
yaad kar lena azizo bhul jaane ka nahin