tassub ki faza mein tana-e-kirdar kya deta

By

tassub ki faza mein tana-e-kirdar kya deta
munafiq doston ke hath mein talwar kya deta
amir-e-shahr to khud zard-ru tha ek muddat se
jharoke se wo ahl-e-shahr ko didar kya deta
hamare din ko jo deta nahin ek dhup ka tukda
hamari raat ko wo chand ka mear kya deta
kahin goli kahin gali mohabbat se hai dil khali
khabar ye thi to bachchon ko naya akhbar kya deta
bahut dushwar hai khuddar rah kar zindagi karna
khushamad karne wala sadqa-e-dastar kya deta
khud us ka saya bhi us se gurezan hai musibat mein
mera ham-saya mujh ko saya-e-diwar kya deta
sarae-jaan mein danista musafir lut gaya warna
ki dil sa sakht-jaan ek gul-badan ko war kya deta

sari duniya mein dana hai apne ghar mein kuchh bhi nahin

By

sari duniya mein dana hai apne ghar mein kuchh bhi nahin
aisa lagta hai ab us ke kisa-e-zar mein kuchh bhi nahin
zauq-e-nazar phir aamada hai jalwon ki paimaish par
khali aankhen ye kahti hain chand-nagar mein kuchh bhi nahin
khud-dari bhi kachcha shisha fankari bhi kachchi nind
sab kuchh kho kar ye paya hai shahr-e-hunar mein kuchh bhi nahin
chaaron khont phira hun lekin apne aap ko pa na saka
ghar aa kar ye raaz khula hai samt-o-safar mein kuchh bhi nahin
purkhon se unwan suna hai bhuk aur nind mein rishta hai
aaj ki raat kathin guzregi aaj to ghar mein kuchh bhi nahin

bachche bhi ab dekh ke usko hanste hain

By

bachche bhi ab dekh ke us ko hanste hain
us ke munh par rang birange sae hain
jalti aankhen le kar bhi itraata hun
sab ke sapne mere apne sapne hain
mera badan hai kitni ruhon ka maskan
meri jabin par kitne katbe likkhe hain
jab se kisi ne bich mein rakh di hai talwar
ham-sae bhi ham-sae se darte hain
shahri bhanwre se kahna ai baad-e-saba
nim ke patte ganw mein ab bhi kadwe hain
ek zara si thes lagi aur tut gae
dil ke rishte kitne nazuk hote hain
kis ko dikhaun apni nazar se tera rup
tere bhi to ek nahin sau chehre hain