KHud sawal-o-jawab karte raho

By

khud sawal-o-jawab karte raho
apne dil se hisab karte raho
kyun ye arman yun hi mar jae
talab-e-aftab karte raho
chandni ho ya chand ho khud hi
tum to niyyat kharab karte raho
chahe tarjih koi de ya nahin
khud ko yun hi sarab karte raho
jab talak jism tut kar na gire
zindagi be-naqab karte raho

KHud ke ehsas-e-mohabbat ne mujhe zinda rakha

By

khud ke ehsas-e-mohabbat ne mujhe zinda rakha
mere kuchh nek khayalat ne tabinda rakha
mujh ko mushkil hi guzarti hai shanasai se
kyunki ai dosto tum ne mujhe sharminda rakha
sahl-dil hun to mujhe aap hi chalna hai mahz
apne meayar ko so khud se hi painda rakha
dil-lagi karti rahi khak-e-mohabbat mujh se
zindagi main ne tujhe ret ka bashinda rakha
kitne rangon se meri sans ke kas-bal tole
phir bhi ji bhatke nahin dhyan ye aainda rakha

DhunDhiye is shahr mein ab kis ko hasil kaun hai

By

dhundhiye is shahr mein ab kis ko hasil kaun hai
aur zara batlaiye kis ke muqabil kaun hai
main ne mizanon se puchha taq par rakh kar zamir
apni in barbaadiyon mein aur shamil kaun hai
khud hawale kar ke jis ne kashtiyan tufan mein
baadban se ja ke puchha mera sahil kaun hai
ye nasim-o-khaar-o-khas kis ne jalaya aag mein
aabshaaron ne ye socha itna jahil kaun hai
barf ka sina pighal kar ek dariya ho gaya
kaun thahra tha yahan par itna mail kaun hai