yas o umid

By

yas
morid-e-zulm hun aamaj-gah-e-tir hun main
takhta-e-mashq-e-sitam qaidi-e-zanjir hun main
saikdon dushman-e-saffak lage hain pichhe
kitne hi nawak-e-bedad ka nakhchir hun main
shaukat-e-rafta ki takhil bhi ab mushkil hai
mahfil-e-dosh ki mitti hui taswir hun main
kis qadar apni tabahi pe karun nauha-zani
mukhtasar ye hai ki phuti hui taqdir hun main
ham-nashin sail-e-hawadis mein baha jata hun
sarhad-e-maut se nazdik hua jata hun
ummid
hai ghalat nauha-e-gham-gauhar shahwar hai tu
fil-haqiqat badi izzat ka saza-war hai tu
maujzan hai teri rag rag mein shahidon ka lahu
badr o ahzab ki jangon ka alam-dar hai tu
jurat-e-khalid-e-jaan-baz mili hai tujh ko
waris-e-zor-e-shah-e-haidar-e-karrar hai tu
kaun kahta hai tujhe jins dani hech-mabarz
tu bahut kuchh hai agar muslim-e-bedar hai tu
tu agar chahe nikal sakti hai sahra mein bhi rah
sai-e-paiham ke liye koh-e-giran ek par-e-kah
kaun kahta hai ki saman se wabasta hai
teri izzat tere iman se wabasta hai
sab se awwal tujhe lazim hai khuda ki pahchan
aadmiyat isi irfan se wabasta hai
khud gira padta hai lazim hai khuda ki pahchan
teri waqat bhi teri aan se wabasta hai
is se kat jae to kaudi bhi nahin mol tera
qadr o qimat teri quran se wabasta hai
tu hai shaki ki zamana ne tujhe khoya hai
aur zamane ko shikayat hai ki tu soya hai

nifaq

By

nifaq se khuda bachae rog ye shadid hai
bala-e-jaan aadmi nishan-e-buz-dili hai ye
zawal-e-admi hai ye wabaal-e-admi hai ye
agar kahun durust hai ki marg-e-admi hai ye
ye gandagi ka dher hai ghilaf mein dhaka chhupa
ye khaufnak zahr hai mithas mein mila-jula
waba-e-haul-nak hai bala-e-haul-nak hai
ye chalti phirti aag hai dayar o mulk o shahr mein
nifaq se khuda bachae rog ye khabis hai
libas-e-jism-e-admi mein kodh hai chhupa hua
munafiqon ki khaslaten ajib hain gharib hain
zaban pe kuchh hai dil mein kuchh kahenge kuchh karenge kuchh
zaban pe dosti ka rag aastin mein chhuri
dilon mein bughz hai bhara magar labon pe hai hansi
zaban par khuda ki rat dilon mein fikr-e-shaitanat
ye apne aap hain khuda gharaz ko pujte hain ye
ye nafs ke ghulam hain mafad ke ghulam hain
ye apne aap muqtadi ye apne khud imam hain

mera saqi

By

kabhi jo ruh pe hoti hai be-hisi tari
dimagh kaif se hota hai yak-qalam aari
pukarta hai jahan-e-fareb-kar mujhe
saman-kada nazar aata hai kharzar mujhe
main phul chhod ke kante pasand karta hun
khazaf utha ke tijori mein band karta hun
buland-baal jo hota nahin hai murgh-e-khayal
qawa-e-fikr pe chhata hai mere izmehlal
kabhi jo chehra-e-ummid zard hota hai
kabhi jo shola mere dil ka zard hota hai
khudi o khud-nigari mujh pe chhai jati hai
durusht-khui mere dil mein rah pati hai
mizaj-e-ishq mein hoti hai jab nami paida
dil o dimagh mein hoti hai barhami paida
to mera saqi mujhe hans ke narm karta hai
nazar mila ke mere dil ko garm karta hai