hum kabhi KHud se koi baat nahin kar pate

By

hum kabhi khud se koi baat nahin kar pate
zindagi tujh se mulaqat nahin kar pate
baith jata hai jahan dard thaka-haara sa
khwab bhi us se sawalat nahin kar pate
un se phir aur kisi shai ki tawaqqo kaisi
chand lamhe bhi jo khairaat nahin kar pate
zindagi be-sar-o-saman hi guzar jati hai
din jo kar lete hain wo raat nahin kar pate
umr-bhar un ke muqaddar mein hain sukhe dariya
apni koshish se jo barsat nahin kar pate
sabr ki baat badi shukr ke dariya gahre
lekin un se guzar auqat nahin kar pate
kabhi bhule se muqaddar jo hamein deta hai
surakh-ru hum wahi lamhat nahin kar pate
ek na ek khauf hamein rok liya karta hai
hum bayan dubte jazbaat nahin kar pate
pas aate hain jahan apne irade 'usha'
hum kabhi un ki mudaraat nahin kar pate

ek aashna akasr pas se guzarta hai

By

ek aashna akasr pas se guzarta hai
mujh pe meri sachchai aashkar karta hai
kis qadar hatela hai tera be-zaban saya
jism ki tarah akasr ruh mein utarta hai
aap kis liye mujh ko dekhte hain hairat se
aadmi mohabbat mein kuchh bhi kar guzarta hai
kya khabar ye basti hi aandhiyon mein ud jae
ek parinda par apne kholne se darta hai
tere nam ke sae rakh ke apne honton par
sirf main bikharti hun tu kahan bikharta hai
ek qarib ka rishta pherta hai jab nazren
aadmi nahin marta e'tibar marta hai
be-zaban lakiren hain na-murad khake hain
dekhna hai ab in mein kaun rang bharta hai
khauf qurbaton ka bhi khauf faslon ka bhi
zindagi ka har lamha dubta ubharta hai
jab tumhaare bare mein sochti hun main 'usha'
aasman se dil mein nur sa utarta hai

andheri shab mein charagh-e-rah-e-wafa dena

By

andheri shab mein charagh-e-rah-e-wafa dena
talluqat ko nazdik se sada dena
jahan khadi hun wahan se palat nahin sakti
abhi na mujh ko mohabbat ka wasta dena
main bebasi ka saliqa nibhaungi kab tak
badhe jo pyas charagh-e-sada bujha dena
bujhe bujhe sabhi manzar hain aashnai ke
mere labon ko koi harf-e-muddaa dena
umid hath se daman agar chhudane lage
to phir mujhe bhi mere shahr ka pata dena
bhatak na jaun kahin gham ki rahguzaron mein
nigah-o-dil ko ujalon ka rasta dena
rafaqaton ko jo tanhaiyan satane lagen
udasiyon ko koi rang-e-ashna dena
agar tumhein bhi koi ikhtiyar mil jae
to phir tadapte dilon ko kahin mila dena
likhe hain ashkon se lamhat-e-zindagi 'usha'
unhen kitab-e-mohabbat mein tum saja dena

akasr tanhai se mil kar roe hain

By

akasr tanhai se mil kar roe hain
hum ne apne ashk aag se dhoe hain
bahut nibhai len-den ki rasmen bhi
kuchh aansu pae hain kuchh gham khoe hain
jab bhi barish ne mitti se munh moda
jalte suraj ne zarraat bhigoe hain
khabar jahan milti hai apne hone ki
hum us manzil par bhi khoe khoe hain
jab khud ko pana hi mushkil kaam hua
kyun kachche dhage mein phul piroe hain
baal-o-par pate hi ude hawaon mein
hum ne jo nazdik ke rishte dhoe hain
tum ko kya malum meri tanhai ne
lafzon mein apne jazbaat samoe hain
hum kya jaanen khwabon ki narmi kya hai
hum kab khushbu ki banhon mein soe hain
baha na le jae un ko barish 'usha'
chattanon par khwab wafa ke boe hain

akasr meri zamin ne mere imtihan liye

By

akasr meri zamin ne mere imtihan liye
zinda hun apne sar pe kai aasman liye
bechaargi kabhi mujhe sabit na kar saki
kya kya meri hayat ne mere bayan liye
apni sadaqaton se bhi lagne laga hai dar
chalna hai is zamin pe sarab-e-guman liye
aur main ki apni zat se nisbat nahin meri
har shakhs phir raha hai meri dastan liye
mangi nahin hai main ne kisi aasman se dhup
zinda hun apne hathon mein apna jahan liye
sara qusur jaise meri bebasi ka tha
ilzam apne sar pe kisi ne kahan liye
unwan iztirab kiye kitne fasle
tum ne qadam qadam pe mere imtihan liye
pahna unhen to main bhi dhanak-posh ho gai
apna samajh ke main ne tumhaare nishan liye
'usha' tamam umr kati intizar mein
aaya na koi ghar mein dil-e-mehrban liye

aasman se sahife utarte rahe

By

aasman se sahife utarte rahe
raushni se magar log darte rahe
zindagi itni majbur si ho gai
hadse mujh ko ashkon se bharte rahe
jin ko sab kuchh mila un ko sab kuchh mila
jo bikharte rahe bas bikharte rahe
ban gain jab bhi hamraaz tanhaiyan
dil ki har baat hum dil se karte rahe
aate jate nazar tujh se milti rahi
aaine zawiyon par ubharte rahe
chand yaaden khilin aur murjha gain
bas hawaon mein zarre bikharte rahe
aap aate rahe git gate rahe
ghar ke diwar-o-dar bhi sanwarte rahe
kuchh bhi tuta nahin kuchh bhi bikhra nahin
hadse raston se guzarte rahe
kab kiya hum ne 'usha' kisi se gila
khud mein jite rahe khud mein marte rahe