qaza jo de to ilahi zara badal ke mujhe

By

qaza jo de to ilahi zara badal ke mujhe
mile ye jam inhi ankhdiyon mein dhal ke mujhe
main apne dil ke samundar se tishna-kaam aaya
pukarti rahin maujen uchhal uchhal ke mujhe
nigah jis ke liye be-qarar rahti thi
saza mili hai usi raushni se jal ke mujhe
main rahzanon ko kahin aur dekhta hi raha
kisi ne lut liya pas se nikal ke mujhe
kahan nujum kahan raste ki gard-e-haqir
ajib wahm hua tere sath chal ke mujhe
ab ek saya-e-be-khanuman bhi sath mein hai
ye kya mila hai tere shahr se nikal ke mujhe
wahi haqiqat-e-umr-e-daraaz ban ke rahe
kisi ne khwab diye the jo chand pal ke mujhe
koi bhi jab hadaf-e-khanjar-e-ada na mila
wo dasht-e-gham se utha le gae machal ke mujhe

bahut dinon mein hum un se jo ham-kalam hue

By

bahut dinon mein hum un se jo ham-kalam hue
dil-o-nazar hama-tan sajda-o-salam hue
hanuz jaise masiha ki aamad aamad hai
agarche umr hui zindagi tamam hue
shafaq si khema-e-jaanan ki samt baqi hai
tamam wadi-o-kohsar gharq-e-sham hue
kai gile the jo shor-e-jahan mein dub gae
kai sitam the jo ehsan ban ke aam hue
kisi taraf jinhen rah-e-gunah mil na saki
kuchh aise log bhi duniya mein nek-nam hue
ufuq ke par kahin se lahu uchhalta hai
zamin se dur bhi kya kya na qatl-e-am hue
chale the un se musibat mein hum gila karne
kuchh aur morid-e-tazhik-e-khas-o-am hue
rah-e-talab mein nae regzar tak pahunche
wo tishna-kaam jo sahra mein tez gam hue

ai saba nikhat-e-gesu-e-muambar lana

By

ai saba nikhat-e-gesu-e-muambar lana
koi tohfa gul-o-nasrin se khush-tar lana
shabnamistan-e-mohabbat ki hasin rahon se
khunki-e-shabnam-o-nur-e-mah-o-akhtar lana
jaan-ba-lab hain tere mushtaq sar-e-rah-e-hayat
dam-e-isa-o-mai-e-lal-o-gul-e-tar lana
ishq ho mast-o-ghazal-khwan-o-surahi-bar-dosh
zindagi taza-o-sarshaar-o-muattar lana
dar-khur-e-mahfil-o-shayan-e-kharabaat-e-mughan
aatishin mutrib-o-be-bak nawa-gar lana
tujh ko andoh-e-asiran-e-qafas ki saugand
aarzuon ke hasin phul khila kar lana
kushtagan-e-sitam-e-daur-e-khizan hain hum log
apne hamrah bahaaron ka payambar lana
is nae daur ke sheron mein taghazzul kam hai
meri uftad tabiat ka sukhnawar lana

aashiq hue to ishq mein hoshyar kyun na the

By

aashiq hue to ishq mein hoshyar kyun na the
hum in ke madah-khwan sar-e-bazar kyun na the
han jab sitam ko ain karam kah rahe the log
hum bhi sharik-e-garmi-e-guftar kyun na the
jab chal raha tha waqt pe jadu nigah ka
ek hum asir-e-chashm-e-fusun-kar kyun na the
ab kya shahid-e-naz bane phir rahe hain log
marne ka shauq tha to sardar kyun na the
'waris' ye shairi sam-e-qatil se kam nahin
aap is bala-e-jaan se khabar-dar kyun na the