wada

rakh to li baat teri ab na kabhi bolunga
ab tasawwur mein kabhi tujh ko na main gholunga
ab na phir panw kabhi teri taraf jaenge
ab na hathon ke irade tujhe chhu paenge
rakh to li baat teri ab na kabhi bolunga
ab na honton pe bila-wajh hansi chhaegi
ab na chehre pe koi shakl utar paegi
ab na zulfon ko tere hathon ki chahat hogi
ab na khwabon ko tere aane ki hasrat hogi
rakh to li baat teri ab na kabhi bolunga
ab na paimane mein taswir teri utregi
ab na dil se koi nazuk si khushi guzregi
ab na darwaze ki dastak pe nazar jaegi
ab na naghmon se mere teri mahak jaegi
rakh to li baat teri ab na kabhi bolunga

tu

kya kahun tujh ko main kya kah ke pukaron tujh ko
jaise qasid koi ek pyar mein dube khat ko
band darwaze ke pallon mein phansa deta hai
aur khat dekh ke ek ishq mein paband nazar
dil-e-mashuq ki har baat samajh jati hai
tu khinchi aati hai yun haule se meri jaanib
khana-e-dil mein usi pyar bhare khat ki tarah
hasrat-e-chashm meri tujh mein simat jati hai
zehn mein azm nigahon mein kai khwab liye
shakh-e-dil mein meri tu risti chali aati hai
rang aur nur faza ka bhi sanwar jata hai
mere jazbaat ko tu ishq sikha jati hai
kya kahun tujh ko main kya kah ke pukaron tujh ko
teri aankhon ka tasawwur tere galon ki mahak
jazba-e-ruh mein tufan utha jate hain
zehn-o-dil par likhe tarikh ke panne panne
teri chahat mein yunhi mitte chale jate hain
aatish-e-ishq se khulta hua kundan sa badan
khud-ba-khud naqsh hua jata hai jaan-o-dil par
khud-ba-khud panw nikal padte hain teri jaanib
baghban dil ko koi jaise ki mil jata hai
aur har samt faqat tu hi nazar aati hai
kya kahun tujh ko main kya kah ke pukaron tujh ko
kyun ye mahsus mujhe hota hai lamha lamha
meri duniya teri chahat ke siwa kuchh bhi nahin
aaj tu hi to hai dastur tasawwur ka mere
jaise duniya mein mera tere siwa koi nahin
meri shakhon pe tere nam ke gul khilte hain
mere patton mein tere rang hare bahte hain
aaj pairon mein thirakte hain tere naz-o-ada
mere naghmon ko tu pur-kaif bana deti hai
kya kahun tujh ko main kya kah ke pukaron tujh ko

kaun

kaun hai jo mujhe aaj chhu kar gaya
kis ka main baaton hi baaton mein ho gaya
meri angdaiyon ka sabab kaun hai
zehn kis khwab mein aaj kal kho gaya
kaun hai jo mujhe aaj chhu kar gaya
dhire se chupke se baat kis ki chali
kis ke lab pe achanak nazar tik gai
thahre thahre qadam kyun lage bhagne
kis ki baaton pe hum dil lage thamne
kaun hai jo mujhe aaj chhu kar gaya
meri aankhon mein taswir jis ki bani
sharm ki chadaron mein wo aa ke chhupi
aaj kuchh yun simatne lagi hai dagar
jaise manzil ne khud tai kiya ho safar
kaun hai jo mujhe aaj chhu kar gaya

kash

mujh mein ai yar mere koi kamalat na dekh
khwab wo hun jo kabhi bhi na haqiqat mein dhala
koi sahil nahin manzil na koi moajiza hun
ahl-e-bazar ka chaha hua saman bhi kahan
jo labon par ho zamane ke na wo naghma hun
mere kahne se na rut koi suhani aae
meri chahat se na kaliyon pe jawani chhae
mere jazbon mein kashish suljhe khayalat na dekh
mujh mein ai yar mere koi kamalat na dekh
main to is dahr ka chhota sa bashar hun jis ne
jina marna bhi faqat mulk ki khatir chaha
zulmat-e-shab ke thapedon se ulajhne ke liye
zulm o aazar ke haiwanon se ladna chaha
mere hathon ne kai bar uthae patthar
mujh mein parwaz-e-baghawat ne panapna chaha
mere jazbaat-o-tasawwur mein badi shiddat thi
aag par chalne ki qadmon ko badi chahat thi
ladne walon mein kabhi ek mera nam bhi tha
apne hathon se kabhi ek mera nam bhi tha
khushnuma rang fazaon mein bikherunga kabhi
kuchh ujalon ke shajar main bhi ugaunga kabhi
chhoti hi shama sahi main bhi jalaunga kabhi
par kahan ho saka jo dil ne mere chaha tha
main ne rasta wo chuna ras na jo aaya tha
khud-gharaz shakhs ke har ek irade ki tarah
meri chahat ke qadam jaane kahan ja pahunche
jin mein hire si chamak lagta tha aa jaegi
mujh mein wo sang the jo mujh se tarashe na gae
apne sagar se guhar mujh se nikale na gae
mujh se rahon mein qadam soch ke dale na gae
ab ye aalam hai ki jine ke liye jita hun
ek afsos o kasak dil mein liye phirta hun
apne sine mein kai bojh liye barson se
rahguzar mein thaka be-sud safar karta hun
main hun sagar mein phansi tanha si kashti ki tarah
jis ki qismat mein siwa bahne ke ab kuchh bhi nahin
main wo gul hun jo mahakta to hai aangan mein mere
jis ki khushbu ne zamane ko diya kuchh bhi nahin
mujh mein ek haare sikandar ke siwa kuchh bhi na dekh
meri sirat mein farozan si hikayat na dekh
mujh mein ai yar mere koi kamalat na dekh

jaise

aaj qasid ko idhar se jo guzarte dikha
mujh ko aisa laga jaise ki tera khat aaya
tu nahin phir bhi chala karti hai duniya meri
ab to mahsus nahin hoti kabhi teri kami
jaane dahliz pe utra tha wo kis ka saya
yun laga jaise ki apna koi wapas aaya
tu mujhe yaad na aae kabhi aisa na hua
phir bhi ro ro ke guzar hota ho ye bhi na hua
jaane kya soch ke in aankhon mein aansu aae
aaj nazuk se kai lamhe mujhe yaad aaya
aaj qasid ko idhar se jo guzarte dekha
mujh ko aisa laga jaise ki tera khat aaya

chand chhupne laga

chalo ghar chalen chand chhupne laga hai
samundar bhi lagta hai sone chala hai
hawaon ki raftar tham si gai hai
na aaega koi sahar ho chali hai
na ab pas mein koi patthar bacha hai
na ab bazuon mein asar rah gaya hai
sadak ki sabhi raushni bujh gai hai
andhera hata rah dikhne lagi hai
na aahat hai koi na koi bharam hai
thaki aarzu aur bojhal qadam hai
nazar par baghawat asar kar rahi hai
zamin bhig kar tar-ba-tar ho chali hai
chalo ghar chalen chand chhupne laga hai