zabt ki koshish hai jaan-e-na-tawan mushkil mein hai

zabt ki koshish hai jaan-e-na-tawan mushkil mein hai
kyun ayan ho aankh se wo gham jo pinhan dil mein hai
jis se chaho puchh lo tum mere soz-e-dil ka haal
shama bhi mahfil mein hai parwana bhi mahfil mein hai
ishq-e-ghaarat-gar ne shah di husn-e-afat-khez ko
shauq-e-bismil hi se kas-bal bazu-e-qatil mein hai
kuchh samajh kar hi hua hun mauj-e-dariya ka harif
warna main bhi jaanta hun aafiyat sahil mein hai
khud tujhe aa jaega aashiq-nawazi ka khayal
tera rahraw kyun khayal-e-duri-e-manzil mein hai
muddaa-e-ishq mera kuchh nahin juz zauq-e-ishq
husn ko hairat ki ye kis sai-e-be-hasil mein hai
apni shan-e-be-niyazi par tumhein kya kya hain naz
kash tum us shauq ko jaano jo mere dil mein hai

yahi hai ishq ki mushkil to mushkil aasan hai

yahi hai ishq ki mushkil to mushkil aasan hai
mila hai dard wo dil ko jo rahat-e-jaan hai
teri nigah samajhti hai ya nahin dekhun
lab-e-khamosh mein koi sawal pinhan hai
murad-e-zauq kharabi ki ab bar aaegi
ki dil ki tak mein wo chashm-e-fitna-saman hai
faragh-e-hauslagi par junun ki shahid hai
wo ek chaak jo daman se ta-gareban hai
ye be-khudi hai mere aish-e-zindagi ki kafil
nigah-e-shauq abhi mahw-e-ru-e-jaanan hai
bala-kashon ki dua hai ki ai khuda na mite
jigar ka dagh ki chashm-o-charagh-e-hijran hai
hawa hai shauq-e-sukhan dil mein mauj-zan 'wahshat'
ki ham-safir mera roab sa sukhan-dan hai

tere aashufta se kya haal-e-betabi bayan hoga

tere aashufta se kya haal-e-betabi bayan hoga
jabin-e-shauq hogi aur tera aastan hoga
zaban-e-sham-e-mahfil se suna hai ahl-e-mahfil ne
tera anjam kya parwana-e-atish-ba-jaan hoga
talatum hai umidon ka tasadum aarzuon ka
dil-e-hangama-parwar kaun tera raazdan hoga
rahen yunhi agar ranginiyan tarz-e-tabassum ki
mere zakhm-e-jigar par khanda-e-gul ka guman hoga
tajammul se guzar hoga tere kuche mein aashiq ka
tamannaon ka lashkar karwan-dar-karwan hoga
kabhi taufiq tark-e-ma-siwa ki ho hi jaegi
dil-e-azad hoga aur aish-e-jawedan hoga
surur-afza-o-masti-khez-o-shorish-afrin hogi
wo bazm-e-sher jis mein 'wahshat'-e-shewa-bayan hoga

labrez-e-haqiqat go afsana-e-musa hai

labrez-e-haqiqat go afsana-e-musa hai
ai husn-e-hijab-ara kis ne tujhe dekha hai
mahfil si sajai hai didar ki hasrat ne
har-chand tera jalwa mahbub-e-tamasha hai
mitta hai kabhi dil se naqsh us ki mohabbat ka
nakaam tamanna bhi majbur tamanna hai
jazbaat ki duniya mein barpa hai qayamat si
is haal mein ru-poshi kya aap ko zeba hai
saqi teri mahfil ko rangin kiya jis ne
wo khun hai taqwe ka ya jalwa-e-mina hai
ek shewa taghaful hai ek ishwa tajahul hai
ghussa hai baja tera shikwa mera beja hai
ye be-dili achchhi hai diwana na ban 'wahshat'
anjam tamanna ka hasrat ke siwa kya hai

hue hain gum jis ki justuju mein usi ki hum justuju karenge

hue hain gum jis ki justuju mein usi ki hum justuju karenge
rakkha hai mahrum jis ne hum ko usi ki hum aarzu karenge
gae wo din jab ki is chaman mein hawa-e-nashw-o-numa thi hum ko
khizan ko dekha nahin hai hum ne ki khwahish-e-rang-o-bu karenge
hikayat-e-arzu hai nazuk zaban kya khak kah sakegi
lab-e-khamosh-o-nigah-e-hasrat se dil ki hum guftugu karenge
jagah jo aankhon mein main ne di thi to un se thi chashm-e-raaz-dari
ye kya khabar thi ki ashk mere mujhi ko be-abru karenge
abhi to gum-karda-rah khud hain mai-e-mohabbat ki be-khudi mein
agar kabhi aap mein hum aae to us ki bhi justuju karenge
us anjuman mein ki chashm-e-saqi kafil ho aish-e-zindagi ki
wo baada-khwari mein kham honge jo fikr-e-jam-o-subu karenge
tahaarat-e-zahiri se hasil na ho sakegi safa-e-baatin
baha ke hum khun-e-tauba 'wahshat' usi se ek din wuzu karenge

dard ka mere yaqin aap karen ya na karen

dard ka mere yaqin aap karen ya na karen
arz itni hai ki is raaz ka charcha na karen
lakh ghafil sahi par aise bhi hum kor nahin
ki chaman dekh ke zikr-e-chaman-ara na karen
aql-o-danish se to kuchh kaam na nikla apna
kab tak aakhir dil-e-diwana ka kahna na karen
wo nigahen ajab andaz se hain ishwa-farosh
gham-e-pinhan ko hamare kahin ruswa na karen
tere aashufta-sar aise bhi nahin saudai
ki dil-o-din ke liye zulf ka sauda na karen
main ne behuda tawaqqo ki saza pai hai
kuchh khayal aap meri hasrat-e-dil ka na karen
mere armanon ko kash itni samajh ho 'wahshat'
ki un aankhon se murawwat ka taqaza na karen