aana hai to aa jao yak aan mera sahab

aana hai to aa jao yak aan mera sahab
ek aan ke hain hum bhi mehman mera sahab
muddat se tumhaara main sau jaan se hun aashiq
kyun jaan ke hote ho anjaan mera sahab
ghusse ho uthe mujh par kyun tir-o-kaman le kar
main hone ko baitha hun qurban mera sahab
nagah sanam yaro mujh se jo mila aa kar
mujh par ye khuda ka hai ehsan mera sahab
ye banda ho ya tum ho wan ghair na ho koi
is dhab ke hai milne ka arman mera sahab
kuchh yaad nahin mujhe ko kafir hun musalman hun
hai gham mein tere yan tak nisyan mera sahab
jo ishq ki manzil ke hain ahl-e-kamal un ka
hai shukr-o-shikayat mein nuqsan mera sahab
saf aaina-e-dil mein raushan hai jamal us ka
bar-aks hai ek aalam hairan mera sahab
sau tarah kahun dil ka ahwal huzur us ke
mere to nahin rahne ausan mera sahab
hum ishq ki daulat se ek kunj-e-qanaat mein
karte hain faqirana guzran mera sahab
yan had se qadam bahar rakhne koi paya hai
is jurm mein sar len hain tawan mera sahab
munsif ho 'muhib' dil mein is baat ko tuk soche
jab be-sar-o-saman ho insan mera sahab
kya sath le aaya tha le jaega kya yan se
phir chahiye kis khatir saman mera sahab
mani mein wo katen hain auqat bahut be-gham
jo shakhs ba-surat hain uryan mera sahab
shamshir-e-barhana ke jauhar nazar aate hain
insaf ki aankhon ke darmyan mera sahab

ai dil aata hai chaman mein wo sharabi tu pahunch

ai dil aata hai chaman mein wo sharabi tu pahunch
le ke piyala gul ka ghuncha ki gulabi tu pahunch
bhar ke saghar kijiye khali gham-e-dauran se dil
ab na kar takhir ai saqi shitabi tu pahunch
pahne qasid jab talak yak-bar sharh-e-ishtiyaq
le kar ai betab dil ki iztirabi tu pahunch
khwahish-e-dil hai ki kije sair-e-aqlim-e-junun
tuk madad ko us ki ai khana-kharabi tu pahunch
jae hai tanha shab-e-tarik mein wo mehr-wash
aah-e-atish-bar le kar mahtabi tu pahunch
ta na phir shair likhen tausif-e-baala-e-butan
misra-e-mauzun-o-sher-e-intikhabi tu pahunch
jalwa-farma aaj hai takht-e-chaman par shah-e-gul
le kar ai paik-e-saba chatr-sahabi tu pahunch
musht-e-khak apni ko aalam mein na zaea kar aziz
hind se le ta-najaf ai bu-turabi tu pahunch
ai 'muhib' khwahish gazak ki ho jo is mai-khwar ko
hai tera sina to dukan-e-kababi to pahunch

ai ham-daman bhulao na tum yaad-e-raftagan

ai ham-daman bhulao na tum yaad-e-raftagan
wamandgan ko hai yahi irshad-e-raftagan
jo ghuncha na-shagufta hi jhad jae shakh se
hai is chaman mein wo dil-e-nashad-e-raftagan
chashm-o-dil-o-jigar ke liye ashk-e-dard-o-dagh
hum pas hai ye tohfa-e-imdad-e-raftagan
is karwan-sara mein ye bang-e-jaras nahin
hai ye sada-e-nala-o-faryaad-e-raftagan
aasida-o-rawinda se puchha bahut 'muhib'
daryaft par na kuchh hui rudad-e-raftagan

ai ham-nafas us zulf ke afsane ko mat chheD

ai ham-nafas us zulf ke afsane ko mat chhed
bas silsila jumban na ho diwane ko mat chhed
jis rang se hai dil mein mere ishq rukh-e-yar
naseh na ho diwana pari-khane ko mat chhed
wo sham-e-majalis to hai fanus mein raushan
ai ishq tu mujh sokhta parwane ko mat chhed
to aap hai paiman-shikan is daur mein saqi
kahta hai mujhe bazm mein paimane ko mat chhed
tarwar se kya hum ko daraata hai miyan ja
yan aap se maujud hain mar jaane ko mat chhed
hamdam na kah us waqt ki bose ki talab kar
majlis mein mujhe galiyan dilwane ko mat chhed
manzur agar chhed hansi ki hai to pyare
hote 'muhib' apne ke to begane ko mat chhed