zamir

By

ruh napak meri qalb bhi napak mera
nafs-e-ammara bahut ho gaya bebak mera
bojh mein apne hi mazi ke daba jata hun
apni hi aag mein ab khud hi jala jata hun
kis taraf jaun kahan dhoun main apna daman
mere maqtul mere sath hain be-ghusl-o-kafn
dekhta hun shab-e-tarik mein jab main tare
nok-e-neza pe nazar aate hain kitne bachche
aaj tak yaad hain mujh ko wo nigahen masum
in hi hathon ne jinhen kar diya badh kar madum
chhatiyan maon ki hans hans ke hain main ne katin
haddiyon se meri talwar ne sadken patin
apni har zarb ka ab khud hi nishana hun main
jurm unwan ho jis ka wo fasana hun main
main ne ismat ke sanam khanon ko mismar kiya
apni bahnon ko supurd-e-sar-e-bazar kiya
kitne mah-pare hue khud meri zulmat ka shikar
kaun kar sakta hai ab mere gunahon ka shumar
chaunk chaunk uthta hun raaton ko main aksar ab bhi
chikhen rah rah ke mere kanon mein aati hain wahi
apne kirdar ko ab kaise bhulaun ai dost
apni hi lash ko ab kaise uthaun ai dost
khae jata hai mujhe ab mere mazi ka khayal
kya mere jurm ki padash hai is darja muhaal

safar-e-na-tamam

By

zindagi kaun si manzil pe ruki hai aa kar
aage chalti bhi nahin
rah badalti bhi nahin
sust-raftar hai ye daur-e-uburi kitna
sakht o be-jaan hai wo paikar nuri kitna
chand ek khwab jo tha
shahr-e-ummid tah-e-ab jo tha
husn ke mathe ka nanha tika
pae aadam ke tale aate hi
utre chehre ki tarah ho gaya kitna phika
ham-junun kesh o tarah-dar hamesha ke jo the
bhagte-sayon ke pichhe daude
dahne baen jo dalin nazren
ho ke be-kaif hata lin nazren
maut aflas jafa ayyari
bhut ifrit chudelen khwari
nachti gati thirakti hansti
qahqahe galiyan ladti dasti
haddiyan chusti yarqan-zada lashon ki
panjon mein tar-e-kafan
shola dahan
basti ki bastiyan jhulsati hui
shahr pahunchin to khule dar pae
chadh gain sidhiyon par khat khat khat
badan hone lage pat
le liya danton mein shiryanon ko
wempaer ki tarah
zindagi kaun si manzil pe ruki hai aa kar
aage chalti bhi nahin
rah badalti bhi nahin
masala ye hai ki ab is mein pahal kaun kare
aasman dur
zamin chur
kahan jae koi
kash aise mein chala aae koi
dil-e-ashufta ko bahlae koi batlae koi
kis tarah phutti hai khushk shajar mein konpal

mudawa

By

kitne bebak hain shair ab ke
kitne uryan hain ye afsana-nigar
kuchh samajh mein mere aate hi nahin
in adab-sozon ke gunjalak-ashaar
yun to apne ko ye kahte hain adib
padhte hain jang ke lekin akhbar
kabhi europe ka kabhi purab ka
zikr karne mein udate hain sharar
dastanen na qaside na ghazal
adab-e-talkh ki har su bhar mar
kabhi punjab ki bhondi baaten
kabhi bangal ke gande afkar
khun-aluda hain un ki nasren
pip bahte hue in ke ashaar
un ke afsanon ke mauzu ajib
kali ladki kabhi kali shalwar
ann-data se kabhi lad baithe
kabhi aflas pe khinchti talwar
un ki nazmon mein koi lutf nahin
na koi naghma na tafsir-e-bahaar
kabhi aawara kabhi khana-ba-dosh
kabhi aurat kabhi mina-bazar
bad-mazaqi ki sarasar baaten
rang o bu chhod ke aandhi ki pukar
harf-e-akhir ki wo shamshir do-dam
zahr mein dubi hui jis ki dhaar
jang-e-azadi ka sar mein sauda
beswa ke liye itne isar
aib-poshi unhen aati hi nahin
zakhm dhote hain sar-e-rah-guzar
ek main bhi to hun pakka shair
magar in baaton se bilkul inkar
sanad-e-mazi se pur mera kalam
fikr-e-imroz se karta hun farar
hota hai saf mera har misra
ek bhi sher nahin zehn pe bar
lekin us ke liye ab kya main karun
ye samajhte nahin mujh ko fankar
inqilab aur adab-ha-e-ghazab
kitne makhdush hain ye sab aasar
gaurki jabir o nazr-ul-islam
yahi do chaar hain in ke meyar
sunne mein aaya hai bahre mere kan
ki khuda se bhi unhen hai inkar
mazhabon se unhen behad nafrat
mabadon par ye udate hain ghubar
hukmaranon ka koi khauf nahin
umra ka nahin kuchh dil mein waqar
chand par khak udane ke liye
jab bhi dekha unhen paya tayyar
mukhtasar ye ki har ek fel un ka
shola-dar-qasr shikan-dar-diwar
main to aajiz hun ilahi tauba
aakhir aaega kabhi un ko qarar
koi lillah hatao un ko
jag utthe hain sulao un ko

man

By

kis ne in aahini-darwazon ke pat khol diye
kis ne khun-khwar-darindon ko yahan chhod diya
kis ne aanchal pe mere dal diye angare
thik se katne bhi na paya tha tauq-e-gardan
abhi to sadiyon ka pamal tha mera khirman
us pe in wahshi-luteron ne siyahkaron ne
mere armanon ko taraj kya lut liya
mere masumon ko be-khana o barbaad kiya
meri bahuon se hawas-khanon ko aabaad kiya
jal gaya mera chaman lut gaya sab meri bahaar
mere barbat mein koi tar nahin ab sabit
meri chikhon mein koi dard nahin ab baqi
mere pyaro meri chhati se lipatne walo
aag wo dil mein lagi hai ki main hi jaanti hun
yun meri kokh jali hai ki main hi jaanti hun
mere bachcho meri namus ke pahredaro
dekho nezon pe tumhaare hain ye kis ki lashen
tum ne khud lut liya apni hi bahnon ka suhag
mang mein jhonk di sindur ki jagah tum ne aag
sharm se ab to hui jati hai gardan meri kham
pani pani hua jata hai musawwir ka qalam
ye tera bait-e-muqaddas teri rifat ka mazar
kis ki manhus nigahon ka bana aaj shikar
kya hue mere wo mansube wo khwab-e-farda
jal gaya mera chaman lut gai sab meri bahaar
mere barbat mein koi tar nahin ab sabit
meri chikhon mein koi dard nahin ab baqi

KHuni qila

By

bahut hi sakht bahut hi tawil hai ye ghadi
is ahd-e-qahqari ka har qadam hai ek sadi
ye ahd jis pe kai naslon ki hai gard padi
ye pir-zal ye qila kanar aab-e-rawan
bhadakte sholon ke manind jis ka har gumbad
ye kangare hain ki hain bhattiyon ke angare
jala ke rakh diye jin ki tapish ne lakhon makan
ye hai alamat-e-fistaiyat girao se
hamare bachchon ke school se hatao ise
ye khuni-qila ka phatak hai ya dahan-e-jahim
fasil-e-sang ibarat hai khun ke dhabbon se
diye lahun ke farozan kiye hue har taq
hai jin ke samne khira tala o gauhar o sim
sada-e-raqs nikalti hui jharonkon se
kisi hasina-e-firaun ka mahal jaise
sutun marmarin angdai le ke nind mein chur
libas-e-barahnagi mein nihan qalo-patra
miyan-e-nil koi lash dekh kar hans de
is ahd-e-qahqari ka har qadam hai ek sadi
bahut hi sakht bahut hi tawil hai ye ghadi
naddi ye hai ki zamin par hai ek lash padi