use samajhne ka koi to rasta nikle

By

use samajhne ka koi to rasta nikle
main chahta bhi yahi tha wo bewafa nikle
kitab-e-mazi ke auraq ulat ke dekh zara
na jaane kaun sa safha muda hua nikle
main tujh se milta to tafsil mein nahin jata
meri taraf se tere dil mein jaane kya nikle
jo dekhne mein bahut hi qarib lagta hai
usi ke bare mein socho to fasla nikle
tamam shahr ki aankhon mein surkh shoale hain
'wasim' ghar se ab aise mein koi kya nikle

tumhaari rah mein miTTi ke ghar nahin aate

By

tumhaari rah mein mitti ke ghar nahin aate
isi liye to tumhein hum nazar nahin aate
mohabbaton ke dinon ki yahi kharabi hai
ye ruth jaen to phir laut kar nahin aate
jinhen saliqa hai tahzib-e-gham samajhne ka
unhin ke rone mein aansu nazar nahin aate
khushi ki aankh mein aansu ki bhi jagah rakhna
bure zamane kabhi puchh kar nahin aate
bisat-e-ishq pe badhna kise nahin aata
ye aur baat ki bachne ke ghar nahin aate
'wasim' zehn banate hain to wahi akhbar
jo le ke ek bhi achchhi khabar nahin aate

tamam umr baDe saKHt imtihan mein tha

By

tamam umr bade sakht imtihan mein tha
wo fasla jo tere mere darmiyan mein tha
paron mein simta to thokar mein tha zamane ki
uda to ek zamana meri udan mein tha
usi pe ho gaya qurban do dilon ka milap
wo jaedad ka jhagda jo khandan mein tha
tujhe ganwa ke kai bar ye khayal aaya
teri ana hi mein kuchh tha na meri aan mein tha

na jaane kyun mujhe us se hi KHauf lagta hai

By

na jaane kyun mujhe us se hi khauf lagta hai
mere liye jo zamane ko chhod aaya hai
andheri shab ke hawalon mein us ko rakkha hai
jo sare shahr ki ninden uda ke soya hai
rafaqaton ke safar mein to be-yaqini thi
ye fasla hai jo rishta banae rakhta hai
wo khwab the jinhen hum mil ke dekh sakte the
ye bar-e-zist hai tanha uthana padta hai
hamein kitabon mein kya dhundne chale ho 'wasim'
jo hum ko padh nahin pae unhin ne likkha hai

mujhe bujha de mera daur muKHtasar kar de

By

mujhe bujha de mera daur mukhtasar kar de
magar diye ki tarah mujh ko mo'atabar kar de
bikharte tutte rishton ki umr hi kitni
main teri sham hun aa ja meri sahar kar de
judaiyon ki ye raaten to katni hongi
kahaniyon ko koi kaise mukhtasar kar de
tere khayal ke hathon kuchh aisa bikhra hun
ki jaisa bachcha kitaben idhar-udhar kar de
'wasim' kis ne kaha tha ki yun ghazal kah kar
ye phul jaisi zamin aansuon se tar kar de

miTe wo dil jo tere gham ko le ke chal na sake

By

mite wo dil jo tere gham ko le ke chal na sake
wahi charagh bujhae gae jo jal na sake
hum is liye nai duniya ke sath chal na sake
ki jaise rang ye badli hai hum badal na sake
main un charaghon ki umr-e-wafa ko rota hun
jo ek shab bhi mere dil ke sath jal na sake
main wo musafir-e-ghamgin hun jis ke sath 'wasim'
khizan ke daur se bhi kuchh dur chal ke chal na sake