wo jaante hi nahin

By

main tum se chhut raha hun mere pyaro
magar mera rishta pukhta ho raha hai is zamin se
jis ki god mein samane ke liye
main ne puri zindagi rehearsal ki hai
kabhi kuchh kho kar kabhi kuchh pa kar
kabhi hans kar kabhi ro kar
pahle din se mujhe apni manzil ka pata tha
isi liye main kabhi zor se nahin chala
aur jinhen zor se chalte dekha
taras khaya un ki haalat par
is liye ki wo jaante hi na the
ki wo kya kar rahe hain

teri yaad

By

main teri yaad ko sine se lagae guzra
ajnabi shahr ki mashghul guzar gahon se
bewafai ki tarah phaili hui rahon se
nai tahzib ke aabaad bayabanon se
dast-e-mazdur pe hanste hue aiwanon se
main teri yaad ko sine se lagae guzra
ganw ki do-pahri dhup ke sannaton se
khushk nahron ke kinaron pe thaki chhanw se
apne dil ki tarah roi hui pag-dandi se
main teri yaad ko sine se lagae pahuncha
bastiyan chhod ke tarse hue viranon mein
talkhi-e--dahr samete hue mai-khanon mein
khun-e-insan pe palte hue insanon mein
jaane pahchane hue logon mein an-jaanon mein
main teri yaad ko sine se lagae pahuncha
apne ahbab tere gham ke parastaron mein
apni ruthi hui taqdir ke gham-khwaron mein
apne ham-manzil-o-ham-rasta fankaron mein
aur fankar ki sanson ke kharidaron mein
main teri yaad ko sine se lagae pahuncha
ye samajh kar ki koi aankh idhar utthegi
meri maghmum nigahi ko mujhe samjhegi
lekin a dost ye duniya hai yahan tera gham
ek insan ko taskin bhi de sakta hai
ek insan ka aaram bhi le sakta hai
khun mein dubi hui tahrir bhi ban sakta hai
ek fankar ki taqdir bhi ban sakta hai
sari duniya ke magar kaam nahin aa sakta
sab ke honton pe tera nam nahin aa sakta

shahr mera

By

shahr mera udas ganga sa
koi bhi aae aur apne pap
kho ke jata hai dhoke jata hai
aag ka khel khelne wale
ye nahin jaante ki pani ka
aag se bair hai hamesha ka
aag kitni hi khaufnak sahi
us ki lapton ki umr thodi hai
aur ganga ke saf pani ko
aaj bahna hai kal bhi bahna hai
jaane kis kis ka dard sahna hai
shahr mera udas ganga sa

KHwab nahin dekha hai

By

main ne muddat se koi khwab nahin dekha hai
raat khilne ka gulabon se mahak aane ka
os ki bundon mein suraj ke sama jaane ka
chand si mitti ke zarron se sada aane ka
shahr se dur kisi ganw mein rah jaane ka
khet khaliyanon mein baghon mein kahin gane ka
subah ghar chhodne ka der se ghar aane ka
bahte jharnon ki khanakti hui aawazon ka
chahchahati hui chidiyon se ladi shakhon ka
nargisi aankhon mein hansti hui nadani ka
muskuraate hue chehre ki ghazal khwani ka
tera ho jaane tere pyar mein kho jaane ka
tera kahlane ka tera hi nazar aane ka
main ne muddat se koi khwab nahin dekha hai
hath rakh de meri aankhon pe ki nind aa jae

khilauna

By

der se ek na-samajh bachcha
ek khilaune ke tut jaane par
is tarah se udas baitha hai
jaise mayyat qarib rakkhi ho
aur marne ke baad har har baat
marne wale ki yaad aati ho
jaane kya kya zara tawaqquf se
soch leta hai aur rota hai
lekin itni khabar kahan us ko
zindagi ke ajib hathon mein
ye bhi mitti ka ek khilauna hai

ek nazm

By

diwali ki raat aai hai tum dip jalae baithi ho
masum umangon ko apne sine se lagae baithi ho
taswir ko meri phulon ki khushbu mein basae baithi ho
aankhon ke nashile doron par kajal ko bithae baithi ho
main dur kahin tum se baitha ek dip ki jaanib takta hun
ek bazm sajae rakkhi hai ek dard jagae rakhta hun
khamoshi meri sathi hai aur dekhne wala koi nahin
ai kash kahin se aa jate jine ka bahana koi nahin