ye humne mana ki hoga visal-e-yar nasib

By

ye hum ne mana ki hoga visal-e-yar nasib
dil-e-hazin ko magar hai kahan qarar nasib
ye apna apna muqaddar hai aur kya kahiye
khizan nasib koi hai koi bahaar nasib
koi to ek nazar ke liye tarasta hai
kisi ko hota hai didar bar bar nasib
na aarzu teri karte na aabru khote
khud apne dil pe agar hota ikhtiyar nasib
suna to hai tera didar ek din hoga
isi ummid pe baithe hain intizar nasib
samajh sakega wo kya mere dil ki betabi
hua na jis ko kabhi soz-e-ishq yar nasib
jahan mein aur bhi 'asi' alam ke mare hain
yahan pe tu hi nahin ek sogwar-nasib

dagh-ha-e-dil ki tabani gai

By

dagh-ha-e-dil ki tabani gai
un ke jalwon ki farawani gai
aashna na-ashna se ho gae
apni surat bhi na pahchani gai
ek dil mein saikdon gham ka hujum
phir bhi us ghar ki na virani gai
ab kahan wo jazba-e-mahr-o-wafa
aadmi se khu-e-insani gai
aaine mein waqt ke ai ham-nafas
doston ki shakl pahchani gai
rah gae hosh-o-khirad ke falsafe
justuju ta-hadd-e-imkani gai
'mir'-o-'ghaalib' 'wahshat'-o-'dagh'-o-'jigar'
kya gae 'asi' ghazal-khwani gai

aap apna nishan nahin malum

By

aap apna nishan nahin malum
lut gae hum kahan nahin malum
le chala hai junun-e-shauq kidhar
hogi manzil kahan nahin malum
daudta hun ghubar ke pichhe
hai kahan karwan nahin malum
jhuk gaya sar-basad khulus-o-niyaz
kis ka hai aastan nahin malum
ek halchal hai khana-e-dil mein
kaun hai mehman nahin malum
barq chamki thi ek bar yahan
kya hua aashiyan nahin malum
jaane kis ke khayal mein 'asi'
ho gae gum kahan nahin malum