chamka jo tirgi mein ujala bikhar gaya

chamka jo tirgi mein ujala bikhar gaya
nanha sa ek jugnu bada kaam kar gaya
wo nind ke safar mein to makhmur tha bahut
aankhen khulin to khwab ke manzar se dar gaya
aansu the is qadar meri chashm-e-malal mein
har gosha gosha shahr ka ashkon se bhar gaya
phaili hui hai chandni ehsas mein mere
ye kaun meri zat ke andar utar gaya
har shakhs hi kamanden 'zafar' phenkne laga
ek pal ke waste jo khala mein thahar gaya

dariya guzar gae hain samundar guzar gae

dariya guzar gae hain samundar guzar gae
pyasa raha main kitne hi manzar guzar gae
us jaisa dusra na samaya nigah mein
kitne hasin aankhon se paikar guzar gae
kuchh tir mere sine mein paiwast ho gae
kuchh tir mere sine se bahar guzar gae
aansu bayan karne se qasir rahe jinhen
kya kya na zakhm zat ke andar guzar gae
ek chot dil pe lagti rahi hai tamam shab
dil ki zamin se yaadon ke lashkar guzar gae
wo zabt tha ki aah na nikli zaban se
dil pe hamare kitne hi khanjar guzar gae
manzil thi wo ki hoti gai dur hi 'zafar'
kitne hi rah mein mil ke patthar guzar gae

ek ek pal tera nayab bhi ho sakta hai

ek ek pal tera nayab bhi ho sakta hai
hausla ho to zafar-yab bhi ho sakta hai
biphri maujon se ulajhne ka saliqa hai agar
ye samundar kabhi payab bhi ho sakta hai
umr tapte hue sahra mein basar ki jis ne
to sarabon se wo sairab bhi ho sakta hai
aap dariya ki rawani se na uljhen hargiz
tah mein us ke koi girdab bhi ho sakta hai
lakh moti hi sahi waqt ki gardish mein kabhi
qimti kitna ho be-ab bhi ho sakta hai
jis ko majbur hua hai to khurachne pe 'zafar'
teri aankhon ka hasin khwab bhi ho sakta hai

ek jumbish mein kaT bhi sakte hain

ek jumbish mein kat bhi sakte hain
dhaar par rakkhe sab ke chehre hain
ret ka hum libas pahne hain
aur hawa ke safar pe nikle hain
main ne apni zaban to rakh di hai
dekhun patthar ye nam bhi hote hain
aise logon se milna-julna hai
sanp jo aastin mein pale hain
koi pursan nahin ghamon ka 'zafar'
dekhne mein hazar rishte hain

har aadmi kahan auj-e-kamal tak pahuncha

har aadmi kahan auj-e-kamal tak pahuncha
uruj had se badha to zawal tak pahuncha
khud apne aap mein jhunjhla ke rah gaya aakhir
mera jawab jab us ke sawal tak pahuncha
ghubar-e-kizb se dhundla raha hamesha jo
wo aaina mere kab khadd-o-khal tak pahuncha
chalo na sar ko utha kar ghurur se apna
gira hai jo bhi bulandi se dhaal tak pahuncha
jise bharosa nahin tha udan par apni
wahi parinda shikari ke jal tak pahuncha
tawaf karte rahe sab hi raste mein magar
har ek shakhs hi gard-e-malal tak pahuncha
meri najat ka hoga 'zafar' wasila wahi
jo lafz nat ka mere khayal tak pahuncha

labon par pyas sab ke be-karan hai

labon par pyas sab ke be-karan hai
har ek jaanib magar andha kuan hai
hai koi aks-e-rangin aaine par
jabhi to aaine mein kahkashan hai
kisi se koi bhi milta nahin ab
har ek insan yahan to bad-guman hai
firaq-o-wasl ka qissa nahin hai
adhuri kis qadar ye dastan hai
nahin kuchh bolte hain jabr sah kar
lage tarshi hui sab ki zaban hai
watan mein rah ke bhi hai be-watan ye
bahut mazlum ye urdu zaban hai
kisi ka dard bante gham mein roe
'zafar' ehsas logon mein kahan hai