aaj ki tanhai se niklo kal ki aabaadi mein aao

aaj ki tanhai se niklo kal ki aabaadi mein aao
jaanan ki turbat se uttho dauran ko sine se lagao
khub nahin ye tarz-e-takalluf aaj taaruf ho jaane do
main bhi apne sar ko jhukaun tum bhi apni tegh uthao
tedhi narden ulte khane madd-e-muqabil be-uslub
ye chausar ka khel bhi kya hai chaal chalo to munh ki khao
tum hi qatil tum hi munsif phir bhi mujhe afsos nahin
aakhir mere dil mein kya hai bujh sako to baat batao
dil ka virana bhi wahi hai teri tamanna bhi hai wahi
zulmat mein raushan hai sitara sahra mein jalta hai alao

aandhiyan uTThin fazaen dur tak kajla gain

aandhiyan utthin fazaen dur tak kajla gain
ittifaqan do charaghon ki lawen takra gain
aah ye mahki hui shamen ye logon ke hujum
dil ko kuchh biti hui tanhaiyan yaad aa gain
is faza mein sarsaraati hain hazaron bijliyan
is faza mein kaisi kaisi suraten sanwla gain
ai khizan walo! khizan walo! koi socho ilaj
ye bahaaren panw mein zanjir si pahna gain
phir kisi ne chhed di uzr-e-jahan ki dastan
dil pe jaise bhigi bhigi badliyan si chha gain

aariz-e-shama pe nind aa gai parwanon ko

aariz-e-shama pe nind aa gai parwanon ko
khwab se ab na jagae koi diwanon ko
un ko malum hai rindon ki tamanna kya hai
aks-e-rukh dal ke bhar dete hain paimanon ko
ai dil-e-zar udhar chal ye tazabzub kya hai
wo to aankhon pe utha lete hain mehmanon ko
wo bhi mutlashi-e-yak-jalwa-e-gum-gashta hain
hum ne nazdik se dekha hai pari-khanon ko
ho gae saf ayan ruh-o-badan ke nasur
raushni mar gai aaj ke insanon ko
un ke har chaak se tanwir-e-wafa phutegi
jashn-e-farda mein sajaenge garebanon ko
qalam-e-dar se tahrir-e-rasan se hum ne
ek naya mod diya ishq ke afsanon ko
josh dariya ke qarain ye batate hain 'zahir'
mauj kha jaegi sahil ke shabistanon ko

ab hai kya lakh badal chashm-e-gurezan ki tarah

ab hai kya lakh badal chashm-e-gurezan ki tarah
main hun zinda tere tute hue paiman ki tarah
koi dastak koi aahat na shanasa aawaz
khak udti hai dar-e-dil pe bayaban ki tarah
tu meri zat meri ruh mera husn-e-kalam
dekh ab to na badal gardish-e-dauran ki tarah
main ne jab ghaur se dekha to wo patthar nikla
warna wo husn nazar aata tha insan ki tarah
ab main kis naz pe kah dun ki use kar le qubul
dil to sad-chaak hai muflis ke gareban ki tarah
abhi kuchh kar-e-mohabbat hai mujhe duniya mein
zindagi khatm na ho sohbat-e-yaran ki tarah
main teri bazm se nikla tha nazar ki ki surat
ab na yun dekh mujhe dida-e-hairan ki tarah
barq ban kar mere khirman ko jalane wale
tu hi barsa tha kabhi abr-e-bahaaran ki tarah

ab ishq se lau lagaenge hum

ab ishq se lau lagaenge hum
ab dil ke bhi kaam aaenge hum
jab jhutputa hoga sham-e-gham ka
palkon pe diye jalaenge hum
hum ban gae hain ada tumhaari
chhedoge to ruth jaenge hum
ai munis-e-dil ai hijr ki raat
le chal diye ab na aaenge hum
kya baithe-bithae ho gaya hai
puchhenge to kya bataenge hum
wo aankh badi jahan-numa hai
us aankh se kya chhupaenge hum
sahra to 'zahir' tang nikla
ab dekhen kidhar ko jaenge hum

ab meri yaad ko daman ki hawaen dena

ab meri yaad ko daman ki hawaen dena
main gaya waqt hun mujh ko na sadaen dena
sakht be-jalwa-o-be-nur hain lamhat-e-firaq
dil bahal jaega chehre ki ziyaen dena
hijr ki pyas se jalte hain bagulon ke dahan
khushk sahraon ko zulfon ki ghataen dena
yaad aate hain jawani ke junun-khez ayyam
muztarib ho ke bayaban ko sadaen dena
phir qadam ku-e-malamat ki taraf utthe hain
mere maula mere hisse ki khataen dena
jama-zebi pe teri warna lagega ilzam
ishq ke paikar-e-uryan ko rawaen dena
us ka mujh par bada ehsan-e-masihai hai
mere yaro mere qatil ko duaen dena