mera adam wajud bhi kya zar-nigar tha

By

mera adam wajud bhi kya zar-nigar tha
chaaron taraf khala mein chamakta ghubar tha
sahil bani nigah ki had fasle mite
girdab-e-mauj-e-dud makan ka hisar tha
pi kar lahu siyah hui kisht-e-arzu
kya dekhte ki khak ka dawa bahaar tha
maujon mein dubti hui surkhi thi sham ki
dil dasht-e-pur-sukut tha dariya qarar tha
ek bojh uthae sham ko lauta hun main nidhaal
main apne dam-e-shauq mein kya khud shikar tha
dil ka suragh kya ki jahan tak nigah ki
nairang-e-naqsh-e-rafta-e-pa-e-farar tha
main ek shajar sukut tha aur meri chhanw mein
girta hua sadaon ka ek aabshaar tha
khurshid-o-mah mere liye ek fasana the
tarik jangalon ka main lail-o-nahaar tha
shoale daraaz dast the aur mere samne
khurshid sham-e-dasht ka tarik ghaar tha
main khak-e-dil bikher raha tha hawa mein 'zeb'
aur is se be-khabar tha ki us mein sharar tha

jhuke hue peDon ke tanon par chhap hai chanchal dhaare ki

By

jhuke hue pedon ke tanon par chhap hai chanchal dhaare ki
haule haule dol rahi hai ghas nadi ke kinare ki
kasi hui mirdang sa pani hawa ki thap se bajta hai
lahar tarang se uthti hai jhankar kisi ektare ki
khuli faza mein nikle to zang-e-yaksani dur hua
ek hawa ke jhonke ne rangat badli angare ki
abr ki tah mein bijli chamki us ka tabassum tha magar aur
lafzon mein pahchan na pae thi jo baat ishaare ki
dekh raha hun band khuda ki mutthi hone wali hai
subh ke moti par ab bhi hai dhimi aanch sitare ki
sakht chatanen shisha pani gul-bute sab zaea the
sang-o-shajar ko mani de gai tan kisi banjare ki

ghaar ke munh se ye chaTTan haTane ke liye

By

ghaar ke munh se ye chattan hatane ke liye
koi neki bhi nahin yaad dilane ke liye
ek nigah-e-ghalat-andaz ka imkan nikla
kuchh zamin aur mili panw badhane ke liye
us ki rahon mein pada main bhi hun kab se lekin
bhul jata hun use yaad dilane ke liye
subh darweshon ne phir rah li apni apni
main bhi baitha tha wahan qissa sunane ke liye
wo mere sath to kuchh dur chala tha lekin
kho gaya khud bhi mujhe rah pe lane ke liye
ek shab hi to basar karna hai is dasht mein 'zeb'
kuchh bhi mil jae yahan sar ko chhupane ke liye

mera nishan bhi DhunDh ghubar-e-mah-o-aKHtar mein

By

mera nishan bhi dhundh ghubar-e-mah-o-akhtar mein
kuchh manzar main ne bhi banae banae hain manzar mein
puchho to zakhmon ka hawala dena mushkil hai
itni be-tartibi si hai dil ke daftar mein
wo maujon ki tesha-zani se gunjti chattanen
wo patthar si raat ka dhalna chand ke paikar mein
itna yaad hai jab main chala tha su-e-dasht-e-bala
maujen marta ek dariya bahta tha barabar main
chamak raha hai khema-e-raushan dur sitare sa
dil ki kashti tair rahi hai khule samundar mein
'zeb' mujhe dar lagne laga hai apne khwabon se
jagte jagte dard raha karta hai mere sar mein

ek pili chamkili chiDiya kali aankh nashili si

By

ek pili chamkili chidiya kali aankh nashili si
baithi hai dariya ke kinare meri tarah akeli si
jab main nasheb-o-rang-o-bu mein utra us ki yaad ke sath
os mein bhigi dhup lagi hai narm hari lachkili si
kis ko khabar main kis raste ki dhul banun ya phul banun
kya jaane kya rang dikhae us ki aankh paheli si
tez hawa ki dhaar se kat kar kya jaane kab gir jae
lahraati hai shakh-e-tamanna kachchi bel chameli si
kam raushan ek khwab aaina ek pila murjhaya phul
pas-manzar ke sannate mein ek nadi pathrili si