sham-e-gham yaad nahin subh-e-tarab yaad nahin

sham-e-gham yaad nahin subh-e-tarab yaad nahin
zindagi guzri hai kis tarah ye ab yaad nahin
yaad hai utna ki main dub gaya pasti mein
kitni unchi hui diwar-e-adab yaad nahin
main ne takhliq kiye sher-o-sukhan ke moti
meri takhliq ka tha kaun sabab yaad nahin
jin ke jalwon se tha aabaad jahan-e-dil-o-jaan
meri nazron se nihan ho gae kab yaad nahin
aankh mein ashk hain ashkon mein ghamon ki talkhi
kaise hote hain wo naghmat-e-tarab yaad nahin
itna hi yaad hai muddat se khafa hain wo 'zuhair'
un ki khafagi ka magar koi sabab yaad nahin

phul ka khilna bahut dushwar hai

phul ka khilna bahut dushwar hai
mausam-e-gul aaj-kal bimar hai
be-wasila baat ban sakti nahin
mil gai kashti to dariya par hai
aansuon ka aur matlab kuchh nahin
mukhtasar si surat-e-izhaar hai
dosti ka raaz ifsha kar gai
dushmani bhi ek bada kirdar hai
hum safine ke liye ek bojh hain
hum agar dube to beda par hai
zindagi ki razm-gahon mein 'zuhair'
sarfaroshi aakhiri tyauhaar hai

jine ki hai umid na marne ki aas hai

jine ki hai umid na marne ki aas hai
jis shakhs ko bhi dekhiye taswir-e-yas hai
jab se masarraton ki hui justuju mujhe
main bhi udas hun mera dil bhi udas hai
lashon ka ek dher hai ghere hue mujhe
aabaad ek shahr mere aas-pas hai
mujh se chhupa sakegi na apne badan ka kodh
duniya meri nigah mein yun be-libas hai
yaran-e-mai-kada mera anjam dekhna
tanha hun aur samne khali gilas hai
ab tark-e-arzu ke siwa kya karen 'zuhair'
is dasht-e-arzu ki faza kis ko ras hai

dil mein rakkha tha sharar-e-gham ko aansu jaan ke

dil mein rakkha tha sharar-e-gham ko aansu jaan ke
han magar dekhe ajab andaz is tufan ke
apni majburi ke aaine mein pahchana tujhe
yun to kitne hi wasile the teri pahchan ke
zakhm khun-alud hain aansu dhuan dete hue
ye suhane se namune hain tere ehsan ke
dard-o-gham ke tapte sahra ki kadakti dhup mein
so gaya hun main teri yaadon ki chadar tan ke
dekhiye kab tak haqiqat tak rasai ho 'zuhair'
chand taron tak to ja pahunche qadam insan ke