andheron se ulajhne ki koi tadbir karna hai

andheron se ulajhne ki koi tadbir karna hai
koi rauzan kisi diwar mein taskhir karna hai
zara dekhun to dam kitna hai is baad-e-mukhalif mein
sar-e-dasht-e-bala ek ghar naya tamir karna hai
nikal aaya hai jo bedad rahon par dil-e-be-khud
koi nawak-fagan aae use nakhchir karna hai
sar-e-dasht-e-junun jo be-khudi ke phul khilte hain
unhen raushan dimaghon ke liye iksir karna hai
makan-e-la-makani ka safar mera nahin rukta
tumhaari yaad ko ab panw ki zanjir karna hai

baal baal duniya par us ka hi ijara hai

baal baal duniya par us ka hi ijara hai
waqt khali hathon se hum ne bhi guzara hai
ku-ba-ku barasta hai yam-ba-yam ubalta hai
khun-e-adamiyat se naqsh la sanwara hai
le chalo charaghon ko kar ke khun se raushan
dasht ki siyahi ne hum ko bhi pukara hai
zad-e-rah ka hum se kyun sawal karte ho
rahzanon ke narghe mein jab hamein utara hai
har-nafas qafas mein hon kaise man lun 'naqwi'
ab khuli fazaen hain aasman hamara hai

be-murawwat hain to wapas hi uTha le shab-o-roz

be-murawwat hain to wapas hi utha le shab-o-roz
mujh ko bhate nahin ye tere nirale shab-o-roz
ek ummid ka tara hai sar-e-baam abhi
us ki kirnon se hi hum ne hain ujale shab-o-roz
jo teri yaad ke sae mein guzare hum ne
hain wahi zist ke anmol hawale shab-o-roz
dasht se khak utha laya tha ajdad ki main
ghar mein rakkhe to hue chand ke haale shab-o-roz
dast-e-khunin na kabhi waqt uthae tujh par
hukm lamhon pe chala dhaal bana le shab-o-roz
apne din-raat se mumkin hai kahan koi farar
dasht-e-wahshat mein utar aur saja le shab-o-roz

bechaini ke lamhe sansen patthar ki

bechaini ke lamhe sansen patthar ki
sadiyon jaise din hain raaten patthar ki
pathrai si aankhen chehre patthar ke
hum ne dekhin kitni shaklen patthar ki
gore hon ya kale sar par barse hain
parkhi hum ne sari zaten patthar ki
nilami ke dar par bebas sharminda
khamoshi mein lipti aankhen patthar ki
dil ki dhadkan badhti jae sun sun kar
shishagar ke lab par baaten patthar ki
andar ki aaraish-e-nazuk kya hoga
bahar wazni hain diwaren patthar ki
aao mil kar un mein dhunden aadam-zad
chalti phirti jo hain lashen patthar ki

dasht mein dhup ki bhi kami hai kahan

dasht mein dhup ki bhi kami hai kahan
panw shal hain magar bebasi hai kahan
lams-e-dasht-e-bala ki hi saughat hai
mere atraf mein be-hisi hai kahan
khak mein khak hun be-makan be-nishan
mera malbus tan khusrawi hai kahan
mera soz-e-darun mail-e-lutf ho
mujh mein shoala-fishan wo nami hai kahan
phunk de badh ke jo tirgi ka badan
meri aankhon mein wo raushni hai kahan
saut-o-harf-e-tamanna se ho ba-khabar
aisi idrak mein naghmagi hai kahan

dur tak ek sarab dekha hai

dur tak ek sarab dekha hai
wahshaton ka shabab dekha hai
zau-fishan kyun hain dasht ke zarre
kya koi mahtab dekha hai
baam o dar par hai sholagi raqsan
husn ko be-naqab dekha hai
nama-bar un se bas yahi kahna
nim-jaan ek gulab dekha hai
ab zamin par qadam nahin tikte
aasman par uqab dekha hai
meri nazron mein bankpan kaisa
jagta hun ki khwab dekha hai